اسوۃالصلحاء مخدوم المشائخ والعلماء فخر نقشبند خواجہ خواجگان
حضر ت مولانا خواجہ خان محمد صاحب دامت برکاتہم العالیہ
سجادہ نشین خانقاہ سراجیہ نقشبندیہ مجددیہ کندیا ں ضلع میانوالی پاکستان
نحمدہ ونصلی علی رسولہ الکریم
امابعد
حضرت مولانا محمد عمرقریشیصاحب دامت برکاتہم العالی کی تصنیف ’’عادلانہ جواب ‘‘کا جستہ جستہ مطالعہ کیا اور فہرست مضامین دیکھی ہے۔ فقیر کا دل بہت خوش ہوا اور دل کی اتھا ہ گہرائیوں سے مصنف کے لئے دعانکلی مماتی فتنہ اہل ایمان کے لئے لمحہ فکریہ ہے اس کی سرکوبی کے لئے جہد مسلسل چاہیئے ۔فقیر دعا گوہے کہ اللہ رب العزت مصنف کی اس کاوش سعید کو قبول فرماوے اور آئندہ بھی علماء حقہ علماء دیوبند کی ترجمانی کی سعادت نصیب فرماوے آمین
اللہ تعالیٰ ہم سب کا حامی وناصر ہوآمین
والسلام
فقیر خان محمد عفی عنہ
خانقاہ سراجیہ
حضرت اقدس خواجہ خان محمد صاحب مدظلہ
کی ایک یاد گار تحریر
ملک حاکم خان صاحب
مکرمی السلام علیکم و رحمۃ اللہ وبرکاتہ
قرون اولیٰ حضرات صحابہ کرام رضوان اللہ تعالیٰ علہیم اجمعین سے لیکر آج تک جمیع علماء کرام کا اجماعی طورپر حیات النبی صلی اللہ علیہ وسلم کے متعلق جو عقیدہ ہے وہ یہ ہے کہ حضرت اقدس نبی کریم صلی اللہ علیہ وسلم اور انبیاء علیہم الصلوٰۃ والسلام وفات کے بعد اپنی اپنی قبروں میں زندہ ہیں اور ان کے ابدان مقدسہ بعینہا محفوظ ہیں اور جسد عنصری کے ساتھ عالم برزخ میں انکو حیات حاصل ہے اور حیات دنیوی کے مماثل ہے۔
صرف یہ ہے کہ احکام شریعہ کے وہ مکلف نہیں ہیں روضۂ اقدس پر جو درود شریف پڑھے وہ بلا واسطہ سنتے ہیں اورسلام کا جواب دیتے ہیں ۔حضرات دیوبند کا بھی یہی عقیدہ ہے اب جو اس مسلک کے خلاف کرے اتنی بات یقینی ہے کہ اس کا اکابر دیوبند کے مسلک سے کوئی واسطہ نہیں ہے جو شخص اکابر دیوبند کے مسلک کے خلاف رات دن تقریریں بھی کرے اوراپنے آپ کو دیوبندی بھی کہے یہ بات کم از کم ہمیں تو سمجھ نہیں آتی ۔ اللہ تعالیٰ ہم سب کو صراط مستقیم اور اکابر دیوبند کے مسلک پر صحیح پابند فرماکر استقامت نصیب فرماوے ۔
فقیر خان محمد عفی عنہ ۔خانقاہ سراجیہ
نوٹ:۔یہ تحریر حضرت مدظلہ نے خود عنایت فرمائی اور نئے ایڈیشن میں شائع کرنے کا حکم فرمایا۔

قدوۃ العلماء شیخ الاسلام حضرت اقدس مولانا
مفتی محمد تقی عثمانی صاحب مدظلہ
سابق رکن شریعت اپیلٹ بنچ سپریم کورٹ آف پاکستان
استاذ حدیث دارالعلوم کراچی
بسم اللہ الرحمن الرحیم
الحمد للہ رب العالمین والصلاۃ والسلام علی رسولہ الکریم وعلی آلہ واصحابہ اجمعین وعلی کل من تبعہم امابعد جناب مولانا محمد عمر قریشی ہاشمی صاحب مدظلہم نے اپنی کتاب ’’ عادلانہ جواب‘‘ بندہ کو تبصرے کے لئے بھیجی جس کے لئے میں ان کا ممنون ہوں باحسان الی یوم الدین
منکرین حدیث محض اپنی عقل نارساکی بنیاد پر صحیح احادیث کا انکار کچھ عرصے سے کرتے آئے ہیں لیکن ان میں سے کچھ لوگوں نے اس انکار کے ساتھ استہزاء اور سوقیانہ انداز کلام اختیار کرکے امام بخاری رحمۃاللہ علیہ اور جلیل القدر محدثین پر تنقید کی نہیں سب وشتم کی بارش کی ہے جس پر اس کے سوا کیا کہا جاسکتا ہے کہ من یضل اللہ فلاہادی لہ
ایک ایسے ہی صاحب نے حال میں حضر ت امام بخاری ؒ اور متعدد رواۃحدیث کے بارے میں جو دریدہ دھنی کی ہے جناب مولانا محمد عمر قریشی صاحب نے اسی کتاب میں اس کا مفصل جواب دیا ہے جن جن احادیث پر اعتراضات کئے گئے ہیں ان میں سے ایک ایک کے بارے میں علماء اہلسنت کے موقف کو واضح اور روشن علمی دلائل کے ساتھ بیان فرمایا ہے جو ایک طالب حق کے لئے حق تک پہنچنے کیلئے کافی وافی ہیں البتہ من یضل اللہ فلا ہادی لہ
اللہ تعالی مولانا موصوف کو اس خدمت پر جزائے خیر عطاء فرماویں اور ان کی اس کاوش کو قبول فرما کر اسے خاص وعام کے لئے نافع بنائیں ۔آمین ۔۲۴ذیقعدہ ۱۴۲۹ھ
بندہ محمد تقی عثمانی عفی عنہ
دارالعلوم کراچی نمبر ۱۴
حضرت اقدس مدظلہ کانوازش نامہ بنام حضرت قریشی صاحب مدظلہ
بسم اللہ الرحمن الرحیم
گرامی قدر مکرم جناب مولانا محمد عمر قریشی صاحب زید مجد کم العالی
السلام علیکم ورحمۃ اللہ وبرکاتہ
گرامی نامہ نے ممنون فرمایا اوراس کے ساتھ آپ کی کتاب ’’عادلانہ جواب‘‘ بھی موصول ہوئی جب شروع میں کسی نے میرے پاس ان صاحب کی کتاب کے اقتباسات بھیجے تھے تو یقین نہیں آتا تھا کہ کوئی شخص جو اپنے آپ کو عالم کہتا یا سمجھتا ہو وہ ایسی باتیں لکھ سکتاہے لیکن من یضل اللہ فلاھادی لہ
اللہ تعالیٰ آپ کو جزائے خیر عطا فرمائیں کہ آپ نے تما م اعتراضات کا پردہ چاک کرکے مسلک اہل السنت کی مدلل ترجمانی فرمائی ہے ۔آپ کے ارشاد کے مطابق چند سطور ارسال خدمت ہیں دعا میں یاد رکھنے کی درخواست ہے ۔
والسلام ۔بندہ محمد تقی عثمانی

منبع العلوم مخزن الفہوم المحد ث الکامل حضرت اقدس مولانا
ڈاکٹر عبدالرزاق صاحب اسکندرمدظلہ مدیر جامعۃالعلوم الاسلامیہ علامہ بنوری ٹاؤن کراچی
باسمہ تعالیٰ
برادر محترم جناب مولانا محمد عمر قریشی ہاشمی صاحب
وفقکم اللہ تعالیٰ وحفظکم
السلام علیکم ورحمۃ اللہ برکاتہ
امید ہے کہ مزاج بخیر ہوں گے
مبارک ہو،آپ نے اس تحریفی ،تخریبی اور جاہلی فتنہ کے خلاف ،،عادلانہ جواب لکھ کر علماء کرام کی طرف سے فرض کفایہ ادا کردیا اور رسول ﷺ کے اس ارشاد کے مستحق بنے ہیں ،
یحمل ہذہ العلم من کل خلف عدولہ ینفون عنہ تحریف الغالین وانتحال المبطلین وتاویل الجاہلین
(مشکوٰۃ المصابیح ۳۶بحوالہ بیہقی )
فجزاکم اللہ عن العلم والعلماء احسن الجزاء وزاد کم علماوتوفیقا
والسلام طالب دعا
عبدالرزاق اسکندر
مہتمم جامعہ علوم اسلامیہ علامہ بنوری ٹاؤن

سید الفضلاء والعلماء فخر المحدثین امام اہل السنۃ والجماعۃ حضرت اقد س علامہ مولانا ابو الزاہدمحمد سرفراز خان صاحب صفدرمدظلہ
فاضل دارالعلوم دیوبند شریف
نحمد ہ تبارک وتعالیٰ ونصلی ونسلم علی رسولہ الکریم
وعلی آلہ واصحابہ وأتباعہ اجمعین
حضرت والدمحترم شیخ الحدیث حضرت مولانا محمد سرفرازخان صفدر دامت برکاتہم کی خدمت میں حضرت مولانا محمد عمرقریشی زید مجدہم کی کتاب ’’عادلانہ جواب‘‘ پیش کئی گئی ہے انہوں نے اس سے اتفاق فرمایا ہے اور موصوف کے لئے دعا کی ہے کہ اللہ تعالیٰ انہیں اس دینی وعلمی خدمت پر جزائے خیر سے نوازیں۔
آمین یا رب العالمین ۔۲۔۱۲۔۲۰۰۸
ابو عمار زاہد الراشدی۔خطیب مرکزی جامع مسجد گوجرانوالہ

جامع الکمال صادق الاحوال فاضل دارالعلوم دیوبند حضرت شیخ الحدیث
مولانا محمد یوسف خان صاحب مدظلہ پلندری ۔آزاد کشمیر
بسم اللہ الرحمن الرحیم
محترم المقام حضرت العلامہ مولانا جناب قریشی صاحب دامت برکاتکم
السلام علیکم ورحمۃ اللہ وبرکاتہ :۔آپ کی کتاب’’ عادلانہ جواب‘‘ بذریعہ پارسل وصول ہوئی جناب کی یاد آوری اور مہر بانی کا شکر گزار ہوں۔
افسوس ہے کہ ضعف عمری کی وجہ سے کوئی طویل تبصرہ یا تقریظ تحریر میں لانے سے بہت قاصرہوں۔ پھر دارالعلوم دیوبند کے فتویٰ کے بعدکسی تبصرہ یا تقریظ کی ضرورت ہی کیا ہے ۔
حسن اتفاق کہ صبح درس بخاری میں ابتدائی طور پر بخاری کی کتاب او را سکے رواۃ کے بارہ گفتگو کے دوران ملتانی صاحب کا ذکر آگیا جس کا میں نے طلباء کے سامنے بڑے دکھے دل کے ساتھ اظہار خیال کیا۔ درس سے فارغ ہواتو آپ کا پارسل وصول ہوا۔ کھولا تو آپ کی کتاب دیکھی ۔جستہ جستہ مقام پر نظر پڑی۔ دل سے دعا نکلی کہ اللہ تعالیٰ آپ کی سعی کو قبول فرماکر اس طرح کے فضول لوگوں کی ہفوات سے عامۃ الناس کو گمراہی سے بچنے کا ذریعہ بنائے۔ آپ کو اس سعی مشکور پر مبارک باد پیش کرتا ہوں اور دعا گوہوں کہ اللہ تعالیٰ آپ کو اپنے والد گرامی کا صحیح جانشین بنائے ۔آمین دعاؤں کا محتاج ہوں
والسلام ۔الافقر محمد یوسف پلندری
۲۳شوال المکرم ۱۴۲۹

شیخ التفسیر والحدیث بقیۃ السلف حضرت مولانا عبدالکریم صاحب مدظلہ
مدیر مدرسہ عربیہ نجم المدارس کلاچی ضلع ڈیرہ اسماعیل خان
فاضل دارالعلو م دیوبند شریف
گرامی قدر مولانا محمد عمر صاحب دامت معالیکم
السلام علیکم ورحمۃ اللہ وبرکاتہ
گراں قدر’’ عادلانہ جواب‘‘ مل گیا آپ کی جانب اس اعزاز پر دوخوشیاں تو نقد حاصل ہوئیں۔ایک یہ کہ خداوند کریم کا شکر ہے کہ حضرت مرحوم آپ کے والد ماجد رحمۃ اللہ علیہ کی جگہ خالی نہیں ہے اور آپ جیسے باقیات صالحات سے ان کی روح مبارک کو مسرتیں حاصل ہورہی ہیں۔ اللہم زد فزد
دوسری مسرت یہ کہ بخاری شریف صدیوں سے مقبول ترین کتا ب کے خلا ف ہرزہ سرائی کرنے والے ذلیل شخص کے خلاف مہر سکوت توڑدینے کی ابتداء ہوگئی فلہ الحمد والشکر
دعا کریں آپ کی اس محنت سے مجھے استفادہ کی توفیق مل جائے ۔حسن خاتمہ اور حفاظت عن المعاصی والمصائب کی دعا کا خواستگار ہوں دریغ نہ فرماویں
والسلام ۔ناکارہ عبدالکریم غفر لہ
جمعہ ۲۴ شوال المکرم ۱۴۲۹

بقیۃ السلف قدوۃ الخلف محقق اہل السنۃ والجماعۃ حضرت اقدس
مولانا محمد نافع صاحب مدظلہ فاضل دارالعلوم دیوبندشریف
عزیزم مولانا محمد عمر صاحب قریشی زید مجدکم وشرفکم
السلام علیکم ورحمۃ اللہ وبرکاتہ مزاج گرامی
تسلیمات مسنونہ کے بعد تحریر ہے کہ آپ کی طرف سے کتاب ’’عادلانہ جواب‘‘ بذریعہ ڈاک موصول ہوئی ۔یاد آوری کا بہت بہت شکریہ
میری طبیعت بہت ناساز رہتی ہے پیرانہ سالی کی وجہ سے ضعف غالب ہے اور صاحب فراش ہوں ۔اس وجہ سے کچھ مستقل مطالعہ جاری نہیں رہ سکتا طبیعت بہتر حالت میں ہوئی تو کتاب دیکھنے کی کوشش کی جائے گی۔ انشاء اللہ تعالیٰ
چترو ڑ گڑھی ملتانی کی کتا ب کا جواب لکھنے کی ضرورت تھی آپ نے اس کو پور ا کردیا ۔جزاکم اللہ تعالیٰ احسن الجزاء ۔یہ شخص بے دین ہے اور بد گو ہے
والسلام مع الاکرام
محمد نافع ۔محمد ی شریف جھنگ
فخر الاماثل محدث جلیل مفکر اسلام حضرت مو لانا
ابو عمار زاہد الراشدی صاحب
مد ظلہ شیخ الحدیث جامعہ نصرۃ العلوم گوجرانوالہ
نحمدہ وتبارک وتعالیٰ ونصلی ونسلم علی رسولہ الکریم
وعلی الہ واصحابہ واتباعہ اجمعین
قرآن مقدس اور بخاری محدث نامی رسالہ میری نظر سے بھی گذرا ہے مگر دوچار صفحات سے زیادہ پڑھنے کی ہمت نہ کرسکا کیونکہ علمی دنیا میں اور اہل علم کے بارے میں سوقیانہ گفتگو پڑھنے یا سننے کا مجھ میں کبھی تحمل نہیں رہا ۔
حضر ت امام المحدثین محمدابن اسماعیل بخاری قدس اللہ سرہ العزیز امت کے اکابر اہل علم وفضل میں سے ہیں ان کی علمی ودینی خدمات وافادات سے امت مسلمہ کم وبیش بارہ صدیوں سے مسلسل استفادہ کرتی آرہی ہیں اور ان کے معاندین ومعترضین کی تمام تر مخالفت کے باوجود یہ سلسلہ ان شاء اللہ تعالیٰ قیامت تک جاری رہے گا
دیگر اہل علم کی طرح حضرت امام بخاری کے اجتہادات واستنباطات سے بھی اختلاف کی گنجائش موجود ہے اور بخاری شریف کے مندرجات کے بارے میں علمی گفتگو ہمیشہ سے ہوتی آرہی ہے لیکن علمی گفتگو کا اپنا ایک انداز اور معیار ہوتا ہے ۔جبکہ حضرت امام بخاری کے بارے میں مذکورہ رسالہ میں جس لہجے میں گفتگو کی گئی ہے میں اسے کسی بھی درجہ میں قابل جواب یا قابل التفات نہیں سمجھتا اور غالبا ایسے ہی مواقع کیلئے قرآن کریم نے سلام کہہ کر توجہ دوسری طرف کرلینے کی بات کی ہے ۔
حضرت مولانا محمد عمرقریشی زید ت مکارمہم ہمارے محترم بزرگ ہیں میں ان کے حوصلے کی داد دیتا ہوں کہ انہوں نے یہ رسالہ نہ صرف پورا پڑھ لیا بلکہ اس کا تفصیلی اور مدلل جواب بھی تحریر فرمادیا جس کی بہت سے حضرات ضرورت محسوس فرمارہے تھے ۔
اللہ تعالیٰ ان کی اس خدمت کو قبولیت سے نوازیں اورزیادہ سے زیادہ لوگوں کے لئے ہدایت اور راہ نمائی کا ذریعہ بنائیں ۔
آمین یا رب العالمین
ابو عمار زاہد الراشدی ۔خطیب مرکزی جامع مسجدگوجرانوالہ
پیر طریقت رہبر شریعت استاذ العلماء شیخ الحدیث حضرت مولانا
اسفند یار خان صاحب مدظلہ جامعہ دارالخیر کراچی
بندہ حقیر محمد اسفند یارمولانا محمد عمر قریشی ہاشمی مد ظلہ العالی کی تصنیف ’’عادلانہ جواب ‘‘ دیکھ کر بہت خوش ہوا اور حضرت موصو ف کے لیے دعا نکلی ۔ا لحمد للہ اب بھی ایسے حضرات موجود ہیں جن میں دینی غیرت موجود ہے
اسفندیار جامعہ دارالخیر کراچی
صاحب الرأی الصائب ذوالفہم الثاقب آیۃ الخیر حضرت مولانا
قاری محمد حنیف صاحب جالند ھری مدظلہ
مدیر جامعہ خیرالمدارس ملتان
بسم اللہ الرحمن الرحیم
نحمدہ ونصلی علیٰ رسولہ الکریم ۔۔۔۔۔۔اما بعد
یہ دور اسلاف کی آراء کے خلاف خود رائی کا ہے ۔اسلاف سے کٹ کر ہرشخص اپنے نئے نظریات کے مطابق قرآن کو سمجھنا چاہتا ہے اور پھر بعض اوقات قرآن پاک کی بعض آیات کو دوسری آیات سے متعارض سمجھ کر قرآن پاک کی حجیت کا انکار کرتا ہے۔ منکرین حدیث نے اپنی غلط سوچ سے بعض احادیث کو قرآن کے متعارض قراردیا، بعض لوگ فقہ کے مسائل کو اپنی غلط سوچ کے منافی ہونے کی وجہ سے قرآن یا حدیث کے منافی قرار دیتے ہیں ۔
اسی آزاد خیال کے نتیجہ میں چندماہ قبل بخاری شریف کے قرآن پاک سے متضاد ہونے پر ایک کتاب قرآن مقدس اور بخاری محدث کے نام سے شائع ہوئی جن میں ۵۴ احادیث کو کتاب اللہ کے معارض ثابت کرکے بخاری اور بخاری کے راویوں کی کردار کشی کی گئی ۔
اس کے جواب میں بہت سے مضمون چھپے مگر ہر اعتراض کا تفصیلی جواب ہر سوال کے تجزیہ کے ساتھ نظر سے نہیں گزرا تھا ۔اس کمی کا کافی احساس تھا یہاں تک کہ مناظر اسلام حضرت مولانا محمد عمرقریشی مدظلہ کی کتاب ’’عادلانہ جواب‘‘ موصول ہوئی اس میں ہر اعتراض کا تفصیلی جواب موجودہے پڑھ کر خوشی ہوئی اور الو لدسر لابیہ کا نظارہ ہوا ۔اللہ تعالیٰ سے دعا ہے کہ اس کتاب کو شرف قبولیت سے نوازیں۔
آمین ثم آمین
محمد حنیف جالندھری
۳ ذی الحجہ ۱۴۲۹۔۲ دسمبر ۲۰۰۸
نوٹ :۔
حضرت والانے ایک مقام پر نظر ثانی کاارشاد فرمایاجو کہ کر دی گئی

عمدۃ الاقران والاماثل صاحب البیان والبنان حضرت
علامہ عبد القیوم حقانی صاحب مدظلہ مدیر جامعہ ابوہریرہ خالق آباد سرحد
الحمدلحضرۃ الجلالۃ والصلٰو ۃ والسلام علی خاتم الرسالۃ
پیر طریقت حضرت العلامہ مولانا محمد عمر قریشی ہاشمی دامت برکاتہم ایک بلند پایہ علمی تحقیقی شخصیت ہیں۔اللہ تعالیٰ نے آپ کو مروجہ علوم وفنون میں کافی دسترس عطاء فرمائی ہے ۔ موصوف خطیب بھی ہیں اور مدرس بھی۔ مناظر بھی ہیں اور صاحب طرز مصنف بھی ۔ادیب بھی ہیں اور پیر بھی۔
آپ کے والد گرامی امام اہلسنت علامہ دوست محمد قریشیؒ سے شاید کوئی ہو جو ان کے اسم گرامی سے واقف نہ ہو ۔علامہ قریشی ؒ نے ایک درجن سے زائد کتب تصنیف فرمائی ہیں ان میں اکثر فرق باطلہ کے تعاقب میں ہیں ۔اصلاح عقائد میں موصوف کے کارنامے ناقابل فراموش ہیں۔
ان کے جانشین وفرزند ارجمند حضر ت مولانا علامہ محمد عمر قریشی بھی اپنے عظیم والد کے نقش قدم پر رواں دواں ہیں ماشاء اللہ مولانا موصو ف نے بھی فرق باطلہ کا خوب تعاقب کیاہے اور اپنے والد کے علوم ومعارف کا ترجمان مشن کا علمبردار اور صحیح جانشین ہونے کا ثبوت دیا ۔
حال ہی میں انہوں نے اپنی تازہ علمی وقلمی کاوش ’’عادلانہ جواب‘‘ میں احمد سعید ملتانی کی بدنام زمانہ کتاب قرآن مقدس اور بخاری محدث میں امام بخاری رواۃ بخاری اور صحیح بخاری پر کیئے گئے ۵۴ اعتراضات کا مسکت او رعادلانہ جواب دیا ہے کتاب دیکھنے سے مولانا کی علمیت اور تحقیق وتدقیق کا اندازہ کیا جاسکتا ہے۔
الحمد للہ ملتانی کی خرافات کو سب سے پہلے ماہنامہ القاسم نے دنیا پرواضح کیا کہ دنیامیں ایسے غلیظ عقائد رکھنے والے اور سلف صالحین کے خلاف اس طرح جارحانہ اور گستاخانہ زبان وقلم استعمال کرنے والے لوگ بھی ہیں۔الحمد للہ ثم الحمد للہ القاسم کا تیر ہدف پرلگا اور علامہ قریشی نے نہایت مدلل اور مسکت جواب تحریر فرماکر علماء کی طرف سے فرض کفایہ ادا کردیا۔
مولانا نے ’’عادلانہ جواب ‘‘میں واضح کردیا ہے کہ ملتانی نے بخاری کی جن روایات کو قرآن کے خلاف ومتضاد ثابت کرنے کی کوشش کی ہے وہ ملتانی کے قرآن وحدیث سے جہالت کج فہمی اور کم فہمی پر واضح دلیل ہے
یقینا’’ عادلانہ جواب‘‘ علم وتحقیق کی دنیا میں ایک نیا اضافہ اور عظیم کارنامہ ہے اس سے مولانا کی علمی استعداد وسعت مطالعہ اور دفاع دین کا جذبہ بھی نمایاں نظر آتا ہے ۔اللہ کریم ان کی کوشش کو قبول فرمائیں ۔عبدالقیوم حقانی
جامعہ ابوھریرہ خالق آباد نوشہر ہ ۔۲ ذوالحجہ ۱۴۲۹

ولی ابن ولی یادگار اسلاف حضر ت مولانا
قاضی محمد ارشد الحسینی صاحب مدظلہ
سجادہ نشین خانقاہ مدنی خطیب مدینہ مسجد اٹک شہر
حضر ت المحترم زید مجدکم وفضلکم
السلام علیکم ورحمۃ اللہ وبرکاتہ
گرامی نامہ مع ہدیہ ثمینہ وصول ہوا جزاکم اللہ احسن الجزاء
امام بخاری امیر المؤمنین فی الحدیث ؒ کی طرف سے آپ نے گستاخ اور بے ادبوں کے سرخیل احمد سعید ملتانی زندیق لعین کو علمی وتحقیقی جواب دے کر امت کی طرف سے فرض کفایہ ادا کردیا ہے ضرورت ہے اس پورے شرذمہ قلیلہ کو جڑ سے اکھاڑ پھینکا جائے۔ بحمد اللہ ہمارے احباب اس پر کام کررہے ہیں اگراسمیں باہم رابطہ رہے توانشاء اللہ کامیابی جلد ہوگی۔
حضرت مولانا سلیم اللہ خان صاحب مدظلہ کا بیان آپ نے القاسم میں مطالعہ فرمالیا ہوگا۔ آپ کو انشاء اللہ اپریل کے پہلے ہفتے میں یہاں اٹک کے لئے تکلیف دیں گے۔
والسلام
مخلص خادم ارشدالحسینی
جامع المعقول والمنقول استاذ العلماء حضرت مولانا
مفتی محمد صدیق صاحب مدظلہ مدیر مدرسہ عربیہ امداد العلوم محمود کوٹ
بسم اللہ الرحمن الرحیم
بگرا میقدر عزیز حضرت قریشی صاحب سلمہ
السلام علیکم ورحمۃ اللہ وبرکاتہ :۔ آپ کتاب دے کر چلے گئے اور مجھے اعتکاف کی حالت میں ایک محبوب مشغلہ مل گیا۔ جزا کم اللہ احسن الجزاء ۔اسی دوران کتاب پڑھی
ایک منحوس مغرور متکبر نخوت سے پر مغز موہن علماء وصلحاء کی یاوہ گوئی ہرزہ سرائی کے جواب میں آپ کی علمی متانت سنجیدہ طر زگفتگو وسعت ظرفی نوعمری کے پر سکون علمی جذبات معتمد علیہا کتب سے مضبوط ومستحکم مسکراتے دلائل دیکھ کر خوشی ہوئی کہ آپ نے اپنے والد گرامی رحمۃ اللہ علیہ کی مسند علمی کو سنبھال لیا ۔ اللہم زد فزد
محدثین ماضی قریب وبعیداور علماء کی طرف سے دفاعی راستہ اختیار کرکے آپ نے ان کی علمی شان کو تحفظ دیا او رکتاب کو اسم بامسمی بنادیا و الحمدللہ علی ذالک ۔
آپ نے ایک چترے کوڑھی (چتروڑگڑھی )کو جس طرح قعرذلت میں دھکیلا تازیست انشا ء اللہ سنبھل نہ پائیگا ۔اللہ تعالیٰ آپ کی اس کاوش علمی کو قبول فرمائے
محمد صدیق مدرسہ امدا دالعلوم محمود کوٹ شہر ۔۶ شوال المکرم ۱۴۲۹ ھ
مناظر اسلام محقق وقت حضرت العلامہ مولانا ابو احمد نور محمد قادری تونسوی
خطیب مرکزی جامع مسجد ترنڈہ محمد پناہ مدیر الجامعۃ العثمانیہ
بسم اللہ الرحمن الرحیم
واجب الاحترام والتکریم حضرت العلام مولانا محمد عمر صاحب قریشی ہاشمی دامت برکاتہم العالیہ
آپ کی تازہ تصنیف ’’عادلانہ جواب‘‘ بذریعہ ڈاک معہ محبت نامہ موصول ہوا کتاب کو دیکھ کر بہت خوشی ہوئی اور پڑھا تو ایمان تازہ ہوگیا ۔الحمد للہ آپ اپنے سلف صالحین کے خلف الرشید ہیں ۔اور مسلک حقہ کی خدمت اور حفاظت آپ کی گویا گھٹی میں پڑی ہوئی ہے۔ اور یہ کتاب بھی اس سلسلہ کی ایک کڑی ہے۔ کیونکہ اشاعت التوحید والسنت والوں نے امام بخاری ؒ اور روات بخاری بلکہ پورے ذخیر�ۂ احادیث کو پرویزیوں کی طرح ناقابل اعتماد گرداننے کی ناپاک جسارت کی ہے اور جو گندا مواد عرصہ دراز سے ان کے اذہان میں پک اور ابل رہا تھا اب وہ کھل کرہر کہ اورمہ کے سامنے آگیا ۔
اللہ تعالیٰ آپ کو اس قلمی جہاد پر جزائے خیر عطا فرمائے آپ نے دفاع حدیث رسول اللہ صلی اللہ علیہ وسلم کا حق ادا کردیا
ایں کار از تومے اید ومرداں چنیں کند
اللہ تعالیٰ علم وعمل میں اور جملہ تصانیف میں برکت پیدا فرمائے اور آئندہ کیلئے بھی ہر باطل سے ٹکرانے کی ہمت اور قوت عطاء فرمائے ۔
والسلام نور محمد قادری
مجاہد اسلام خطیب اہلسنت حضرت
مولانافیض محمد فیض نقشبندی مدظلہ
خطیب جامع مسجد ملیہ سلیمانیہ سندھ پارلیمنٹ
بسم اللہ الرحمن الرحیم
میرے شیخ وشیخ زادہ مناظر اسلام پیر طریقت حضرت علامہ محمد عمر قریشی ہاشمی دامت برکاتہم جانشین مخدوم العلماء استاذالمناظرین غزالی دوران شیخ الاسلام حضرت علامہ دوست محمد قریشی ہاشمی نقشبندی مجددی رحمہ اللہ نے ایک ضال ومضل راہ حق سے ہٹے اور گمراہی وبدعقیدگی کی ناپاک ونجس دلدل میں لتھڑے ،عقل ودانش سے پیدل شخص، چتروڑگڑھی کی گھٹیا وناشائستہ زبان میں تحریر شدہ جاہلانہ کتاب بنام (کتاب قرآن مقدس وبخاری محدث)کا ’’عادلانہ جواب‘‘ نہایت ہی فاضلانہ وعالمانہ انداز میں لکھ کر اہل علم ومتلاشیان راہ حق پر احسان عظیم فرمایا اوراپنے والد بزرگوار رحمہ اللہ کی صحیح علمی عملی ودینی جانشینی کا حق ادا کیا اور حدیث وسنت دوستی کا ثبوت دیا
ایں سعادت بزور باز ونیست
تانہ بخشد خدائے بخشندہ
درحقیقت حضرت صاحبزادہ صاحب مدظلہ کی یہ پر خلوص کوشش محض فضل خداوندی ومحبت نبوی صلی اللہ علیہ وسلم کا ثمر وصلہ ہے ۔
بندہ ناچیز کی دلی دعا ہے کہ اللہ رب العزت حضرت الشیخ کی اس سعی جمیل کو اپنی درگاہ پاک میں شرف قبولیت سے نوازے نیز اہل علم کے لئے خصوصااور عامۃ المسلمین کے لئے عموما نفع مند وذریعہ ہدایت ونجات بنائے اوراحقاق حق وابطال باطل پر مزید زور بازووقوۃ قلم نصیب فرمائے ۔آمین
فیض محمد فیض نقشبندی صدر تنظیم اہلسنت سندھ
مہتمم جامعہ اسلامیہ نقشبندیہ فیض آباد کوٹ ادو
مناظر اسلام ترجمان احناف استاذالعلماء حضرت العلامہ
مولانامحمدانوراوکاڑوی مدظلہ جامعہ خیرالمدارس ملتان
حامداومصلیا۔امابعد
اکابرین امت پر عدم اعتماد کی فضاعام ہو چکی ہے بہت سے لوگو ں نے اسلاف سے کٹ کرقرآن وحدیث اور فقہ پر اعتراضات شروع کر دیئے حالانکہ اس میں قرآن وحدیث وفقہ کاقصور نہیں اپنی فہم کاقصور ہے اسی سلسلہ کی ایک کتاب قرآن مقدس اور بخاری محدث احمد سعید چتروڑ گڑھی کی شائع ہوئی جس میں احادیث بخاری اور قرآن پا ک میں تضاد ثابت کرکے روایات بخاری ،امام بخاری اور رواۃ بخاری پر سخت غلیظ حملے کیے ہیں۔ اگرچہ عنوان محبت قرآن اور دفاع امام ابوحنیفہ کابھی ہے مگر طرزاستدلال منکرین حدیث اور شیعوں والاہے ۔
اس مادرپدرآزاد ی کی فضامیں لوگوں کے گمراہ ہونے کاسخت اندیشہ تھااسلیے بعض رسائل میں اور بعض کتب کی صورت میں اس کی تردید کی گئی مگر ہرمضمون میں کچھ علمی تشنگی باقی تھی ۔حضرت مولانامحمدعمر قریشی ہاشمی زید مجدہ کے’’عادلانہ جواب‘‘ پڑھ کر وہ تشنگی الحمد للہ دور ہوگئی ۔
مولانا نے دلائل قاہرہ سے ثابت کیاہے کہ جن احادیث کوقرآن پاک سے متضاد سمجھاگیاہے ۔الحمدللہ ان میں ذرہ برابرتضاد نہیں البتہ چتروڑی صاحب کی کج فہمی سے یہ تضاد پیدہوا۔
ہم چتروڑی کے غلط مفہوم کو قرآن یاحدیث ماننے کے لیے تیارنہیں اہل علم بلکہ عوام کے لیے یہ’’ عادلانہ جواب‘‘ حفظ ایمان کاتریاق ہے۔بلکہ بنظر انصاف حامیان چتروڑی بھی اس کا مطالعہ کریں تو انشاء اللہ ان کے لیے ہدایت کاذریعہ بنے گی ۔
اللہ تعالیٰ مصنف کی عمر اور علم میں برکت عطا فرمائیں اور دارین میں اجر سے نوازیں ۔آمین
کتبہ محمد انور اوکاڑوی ۔جامعہ خیر المدارس ملتان
استاذ العلماء شیخ الحدیث حضرت العلامہ
مولانا عبدالمجیدصاحب فاروقی مدظلہ
مدیر جامعہ قاسمیہ شرف الاسلام چوک سرور شہید ضلع مظفر گڑھ
بسم اللہ الرحمن الرحیم
اللہ کریم نے آخر الزمان پیغمبر صلی اللہ علیہ وسلم کو جو سچا دین عنایت فرمایا وہ آخری دین ہے جس کی بنیاد اللہ کریم کا کلام مقدس ہے اور اس کلام کی تفصیل وتشریح رسول اللہ صلی اللہ وسلم کے ذمہ لگائی گئی فرمایا
وانزلنا الیک الذکر لتبین للناس مانزل الیہم (القرآن)
رسول محتشم صلی اللہ علیہ وسلم نے اس ارشاد ربانی کی جو تعمیل فرمائی اس کو اہل اسلام ’’حدیث ‘‘کہتے ہیں ۔ الفاظ قرآن کی تحریف وتبدیلی بے دینوں کے بس کا روگ نہیں اس لئے ہر دور کے بے دینوں نے حدیث کو نشانہ ستم بنایا اور اہل اسلام کو اس سے دور کرنے کی سعی ناتمام کی تاکہ حدیث پاک کو ناقابل اعتماد ٹھہراکر قرآن کی تفسیر اپنی من مانی مرضی سے کریں جس کے لئے ارشاد فرمایا یضل بہ کثیر اویہدی بہ کثیر ا
امام ہمام بخاری کی ’’الجامع الصحیح‘‘ حدیث پاک کی وہ کتاب ہے جس پر پوری امت مسلمہ کو ہر دور میں اعتماد رہا ہے اور یہ وہ مایہ ناز کتاب ہے کہ اس کی ہر حدیث کی سند معتبر روات کے ذریعہ رسول اللہ صلی اللہ سلم تک جڑی ہوئی ہے ۔
کچھ عرصہ قبل احمد سعید نامی ایک صاحب نے انتہائی گھٹیا اور سوقیانہ انداز میں صحیح بخاری اور اس کے ذی وقا ر مصنف امیر المؤمنین فی الحدیث امام بخاری اور صحیح بخاری کے روات پر گالی سے لبریز ایسی گندی تنقید کی (الامان والحفیظ ) اہل علم تو کجا کوئی اجہل اور معمولی حیا والا آدمی بھی ایسی گندی زبان استعمال نہیں کرتا (قرآن مقدس اور بخاری محدث)کے نام سے وہ کتاب شائع ہوئی تو اہل علم میں شدید اضطراب پیدا ہوا اور جواب دینے کے لئے مشورے ہونے لگے اللہ کریم کی توفیق سے قرعہ فال ہمارے مخدوم زادہ محترم علامہ مولانا محمد عمر قریشی ابن علامہ زماں مولانا دوست محمد قریشی ؒ کے نام نکلا جو الولد سر لابیہ کے مصداق اتم ہیں۔ انہوں نے اس کتاب کا علمی اور تحقیقی انداز میں ’’عادلانہ جواب‘‘ تصنیف فرما کر علماء امت کی طرف سے فرض ادا کردیا اور نقلی دلائل کے ساتھ عقلی طور پر دلنشین اندا ز میں ہر مسئلہ کی وضاحت کی اہل علم کے دل سے دعائیں نکلیں کہ اللہ کریم اس قابل قدر علمی خدمت کو شرف قبولیت سے نوازیں ۔فجزاہ اللہ عن سائر المسلمین احسن الجزاء واکمل الجزاء آمین بحرمۃ سید المرسلین علیہ الف الف الصلٰوۃ والتسلیم
محمد عبدالمجید عفی عنہ
خادم الحدیث جامعہ قاسمیہ شرف الاسلام چوک سرور شہید
یکم ذی الحجہ ۱۴۲۹۔30/11/2008
شیخ الحدیث پیر طریقت حضرت العلامہ مولانا
مفتی حبیب الرحمان صاحب درخواستی مدظلہ
بسم اللہ الرحمن الرحیم
عظیم باپ کے عظیم فرزند کا عظیم کارنامہ
حق وباطل کا معرکہ نفوس قدسیہ طائفہ ربانیہ اور شیطانی وطاغوتی ٹولہ کا نظریاتی تقابل ہمیشہ سے چلا آرہا ہے۔
حتی کہ یہ تسلسل اپنے آپ کو سمیٹتے ہوئے ماضی قریب میں وارثان انبیاء علیہم السلام ،کاروان ولی اللہی، علماء اہلسنت والجماعت، علماء دیوبند زادہم اللہ شرفا اور اسلام کو کمزور کرنے کے لئے اسلام سے عوام الناس کو متنفر کرنے کے لئے انگریز کی سرپرستی میں پھلنے پھولنے والے مختلف گمراہ فرقوں کے درمیان ہوتا ہوا نظرآتا ہے ۔
پھر اسی تسلسل کے میدان میں ایک اسلام کا شیرکفر وشرک، رافضیت وخارجیت، منکرین شریعت وطریقت کو للکارتا ہوا نظرآتا ہے میری مراد عارف باللہ استاذالمناظرین خطیب اہلسنت حضرت العلامہ مولانا دوست محمد قریشی نورا للہ مرقدہ ہیں ۔
اب حال ہی میں ایک بدبخت ،بدقسمت انسان نے بظاہر امام بخاری ؒ کو اور درحقیقت جناب رسول اللہ صلی اللہ علیہ وسلم کی ذات اقدس کو نشانہ بنایا ہے ۔العیاذ باللہ
کیونکہ اس بدبخت نے احادیث رسول اللہ صلی اللہ علیہ وسلم جو وحی غیر متلو ہے پر جان بوجھ کر جھوٹے اعتراضات تراشے ہیں ۔کلام اللہ وکلام رسول، وحی متلو ووحی غیر متلو کے مابین تعارض وٹکراؤ شو کرکے ناموس رسالت وعصمت رسول اللہ صلی اللہ علیہ وسلم پر اپنے ناپاک ہاتھ ڈالنے کی مذموم کوشش کی ہے ۔
فقیر سمجھتا ہے اس بدبخت نے امام بخاری پر کوئی اعتراض نہیں کیا اور نہ ہی امام بخاری پر اس کا اعتراض بنتا ہے اسلئے کہ اسکا اعتراض تو یہ ہے کہ امام بخاری نے یہ روایات کیوں ذکر کی ہیں یا اعتراض یہ ہے کہ ان احادیث رسول اللہ کو امام بخاری نے اپنی کتاب میں روایۃ لا کر ان ان جرائم کا ارتکاب کیا ہے ۔العیاذ باللہ
فقیر عرض کرتا ہے :۔سوچنے کی بات ہے
(۱)کہ یہ احادیث، احادیث بخاری ہیں یا احادیث رسول اللہ صلی اللہ علیہ وسلم؟
(۲)ان احادیث مبارکہ کو صرف امام بخاریؒ اپنی کتاب میں لائے ہیں یا دوسرے ائمہ حدیث نے بھی اپنی کتب احادیث میں ان کو ذکر فرمایا ہے؟
(۳)کیا ان احادیث مبارکہ کو امام بخاری نے براہ راست خود رسول اللہ صلی اللہ علیہ وسلم سے روایت کیا ہے یا امام بخاری سے پہلے تبع تابعین ،تابعین اور صحابہ کرام رضوان اللہ اجمعین نے روایت فرمایا ہے؟
اگر یہ احادیث مبارکہ امام بخاری کی اپنی کلام ہوتی یا ان احادیث کو فقط امام بخاری ہی اپنی کتاب میں لاتے یا امام بخاری براہ راست ان احادیث کو رسول اللہ صلی اللہ علیہ وسلم سے روایت کرتے ہیں تو امام بخاری پر اعتراض کی گنجائش ہوتی اور جبکہ صورت بالکل اس کے برعکس ہے ۔
*جب امام بخاری کی طرح اکثر ائمہ حدیث ان احادیث مبارکہ کو روایۃ اپنی کتب احادیث میں لاتے ہیں تو اس بدبخت نے جملہ ائمہ حدیث پر عدم اعتماد کی ناپاک جسارت کی ہے
*اور جب ان احادیث مبارکہ کو امام بخاری نے براہ راست رسول اللہ صلی اللہ علیہ وسلم سے اکیلے روایت نہیں فرمایا بلکہ تبع تابعین ،تابعین اور صحابہ کرام نے پہلے روایت فرمایا اور امام بخاری نے بعد میں تو اس بد بخت کے تیروں کا نشانہ پہلے صحابہ کرام رضوان اللہ اجمعین ،تابعین وتبع تابعین ہیں اور بعد میں کوئی دوسرا
* جب یہ احادیث امام بخاری کی باتیں نہیں بلکہ رسول اللہ صلی اللہ علیہ وسلم کی احادیث مبارکہ ہیں تو پھر یہ گستاخانہ انداز خود حضرت خاتم الانبیاء صلی اللہ علیہ وسلم کی ذات اقدس پر ایک کافرانہ جرأت ہے ۔
*جب دین کے حوالہ سے کلام رسول اللہ وحی الہٰی ہوتی ہے ۔وما ینطق عن الہوی ان ہو الا وحی یوحی ۔تو اس بدبخت کی بدبودار گفتگو وتحریر براہ راست اللہ جل جلالہ اور جناب رسول اللہ صلی اللہ علیہ وسلم کی کھلی توہین ہے ۔اعاذنااللہ منہ
اس بد بخت کی یہ ناپاک تحریر وکتابچہ جو ملعون رشد ی کی گستاخیوں کا مجموعہ تھی شائع ہوکر عوام میں تقسیم ہونے لگی تو غیور مسلمانوں میں بالعموم اور علماء کرام میں بالخصوص غیض وغضب کی لہر دوڑ گئی۔ کئی علماء اس کتابچہ کا رد لکھنے کا ارادہ کررہے تھے کہ ادھر میدان حق کا غازی عارف باللہ علامہ قریشی رحمہ اللہ کی روح بے قرار ہوکرپھر میدان عمل میں اتر آئی یعنی اس عظیم باپ کا عظیم فرزند مناظر اسلام پیر طریقت حضرت العلامہ مولانا محمد عمر قریشی مدظلہ تحفظ ناموس رسالت کے میدان میں اتر کر سبقت لے گئے۔
ایں سعادت بزوربازونیست
تانہ بخشد خدائے بخشندہ
ذالک فضل اللہ یوتیہ من یشاء
انہوں نے سب سے پہلے یہ عظیم کارنامہ سرانجام دیا اور اس سعادت عظمیٰ کو حاصل کرکے علماء حق کی ذمہ داری پوری کردی۔ اور علمی حلقہ میںیہ پھر آشکارہو گیا کہ واقعی عظیم باپ کافرزندبھی عظیم ہے ۔علم وعمل ،تدریس وتصنیف، تحقیق وتدقیق ،خطابت وتحریر اور عشق رسول، غیر ت ایمان میں اپنے والد گرامی کا صحیح جانشین ہے۔
دعا ہے کہ اللہ تعالیٰ ہمارے برادر محترم مناظر اسلام خطیب اہلسنت حضرت مولانا محمد عمر قریشی صاحب مدظلہ کی اس عظیم کاوش کو قبول فرمائے ،مسلمانوں کے لئے دجالوں کے دجل سے حفاظت اور امت مسلمہ کے لئے سچی راہنمائی وہدایت کا ذریعہ بنائے۔آمین یارب العالمین
وصلی اللہ تعالیٰ علی خیر خلقہ محمد والہ اصحابہ اجمعین
حبیب الرحمان درخواستی
شیخ الحدیث ومہتمم جامعہ عبداللہ بن مسعود خانپور۔ امیرمرکزیہ مجلس علماء اہل السنۃ والجماعۃ پاکستان
سرپرست جمعیت علماء اسلام پاکستان ۔۱۴ ذوالحجہ ۱۴۲۹
ماہنامہ الفاروق کراچی
ذوالحجہ ۱۴۲۹ ھ صفحہ۶۰
زیر سرپرستی ۔حضرت اقدس شیخ الحدیث حضرت مولانا سلیم اللہ خان صاحب مدظلہ
فاضل دارالعلوم دیوبند صدر وفاق المدار س العربیہ پاکستان
کچھ عرصہ قبل ایک صاحب احمد سعید چتروڑی نے امام محدثین محمد بن اسماعیل بخاری کی صحیح بخاری پر انتہائی نامناسب اسلوب میں اعتراضات کئے تھے اور اصح الکتب بعد کتاب اللہ کی ثقاہت پر جرح کرتے ہوئے اسے غیر معتمد قرار دینے کی کوشش کی ۔چتروڑی صاحب نے اپنے رسالے کا نام ’’قرآن مقدس اور بخاری محدث‘‘ رکھا ۔
مختلف حضرات علماء کرام نے ان کے اعتراضات کا جواب دیا ہے ۔زیر نظر کتاب میں جناب مولانا محمد عمرقریشی صاحب نے بھی ان کے چون اعتراضات کے تفصیلی جواب دیئے ۔
چتروڑی صاحب نے اپنے اعتراضات میں عموماً قرآن کریم اور صحیح بخاری کی روایات کے درمیان تعارض ثابت کرنے کی کوشش کی ہے ۔جنا ب مولانا قریشی صاحب نے ہر اعتراض کو نقل کرکے اس کا جواب دیا ہے اور جمہور اہل السنۃ والجماعۃ کے نزدیک قرآن وحدیث کے صحیح مفاہیم کی وضاحت کی ہے اور ہربات باحوالہ لکھی ہے اس طرح انہوں نے اہل حق کی طرف سے ایک فریضہ ادا کیا ۔


ماہنامہ وفاق المدارس ملتان
شمارہ نمبر ۱۲ ذوالحجہ ۱۴۲۹ ھ دسمبر 2008ء
چند ماہ پہلے مولوی احمد سعید ملتانی نے قرآن مقدس اور بخاری محدث نامی ایک کتاب لکھی جس میں انہوں نے منکرین حدیث اور اہل تشیع کی باتوں کا چربہ لیکر امام بخاری رواۃ بخاری اور احادیث صحیح بخاری پر کیچڑ اچھالنے کی کوشش کی انہوں نے کتاب میں انتہائی گھٹیا بازاری اور سوقیانہ انداز اختیار کیا ہے سب سے پہلے ماہنامہ القاسم کے مدیر مولانا عبدالقیوم حقانی صاحب نے القاسم کے پرچوں میں اس پر تردیدی مضامین لکھ کر علمی حلقوں کو مؤلف کی گمراہی اور کوتا ہ بینی سے آگاہ کیا ۔
’’عادلانہ جواب‘‘ کے نام سے زیرنظر تالیف بھی مذکورہ بالا کتاب کا ایک علمی جواب ہے جسے حضرت مولانا دوست محمد قریشی رحمۃ اللہ تعالیٰ کے فرزند ارجمند مولانا محمد عمر قریشی صاحب نے مرتب کیا ہے انہوں نے امام بخاری رواۃ بخاری اور احادیث صحیح بخاری کے خلاف ہرزہ سرائیوں پر مشتمل اس کتاب کے 54اعتراضات کے تحقیقی جوابات دیئے ہیں۔
کتاب کی ابتداء میں دارالعلوم دیوبند کے دارالافتاء کا فتوی بھی نقل کیا گیا ہے جس میں احمد سعید ملتانی کی کتاب کی مذمت کی گئی ہے اور کتاب کے مؤلف کو ضال اور مضل قرار دیا گیا ہے ۔
زیر تبصرہ کتاب پر دارالعلوم کہرو ڑ پکا کے استاذ حدیث حضرت مولانا محمد منیر احمد منور صاحب کا پیش لفظ ہے جس میں انہوں نے کتاب کی ترتیب وتالیف میں کی گئی محنت وسعی کو سراہا ہے۔ اللہ تعالیٰ مؤلف موصوف کو ا س کاوش کا دارین میں صلہ عطاء فرمائے۔

مخدوم العلماء ولی کامل حضرت مولانا ارشاد احمد صاحب دامت برکاتہم
مدیرو شیخ الحدیث جامعہ دارالعلوم کبیر والا
بسم اللہ الرحمن الرحیم
برادر مکرم مناظر ابن مناظر میدان تحقیق کے شہسوار حضرت علامہ قریشی صاحب زید مجدہ کی کتاب ’’عادلانہ جواب‘‘ بجواب ’’قرآن مقدس بخاری محدث‘‘ مصنفہ احمد سعید چتروڑی نظر سے گزری۔ ماشاء اللہ محققانہ انداز، شستہ وشائستہ وشگفتہ گفتار، دلائل سے بھر پور مخالف کی ہر دلیل کا جواب احسن انداز میں دیا گیا ہے ۔مصنف الولدسر لابیہ کے صحیح مصداق ہیں ۔اپنے والد گرامی حضرت علامہ دوست محمد قریشی رحمۃاللہ تعالیٰ کے صحیح علمی جانشین ہیں۔ اہل باطل کے نظریات کی تردید اور انکا تعاقب حضرت ؒ کا طرہ امتیاز تھا اور یہی خاص ذوق حق تعالیٰ شانہ نے آپ کے خلف الرشید فرزند ارجمند کوبھی عطا فرمایا دعوت وتبلیغ وتدریس کے ساتھ ساتھ میدان تصنیف کے بھی شہسوار ہیں۔ اہل بدعت وروافض وفرقہ لا مذہبیہ کے نظریا ت کی تردید میں کئی رسائل تصنیف فرماچکے ہیں ۔تازہ تصنیف احمد سعید چتروڑی کے رسالہ’’ قرآن مقدس اور بخاری محدث‘‘ کا’’ عادلانہ جواب‘‘ ہے جوکہ علماء طلباء ودین دوست طبقہ کیلئے انتہائی مفید ہے
اللہ تعالیٰ برادرمحترم کی اس خدمت دین کو قبول فرمائیں۔ آمین
فقط والسلام
حررہ ۔العبد الضعیف ارشاد احمد عفی عنہ
خادم جامعہ دارالعلوم عیدگاہ کبیر والا ۔۱۴۲۹۔۱۲۔۲۰

استاذ العلماء حضرت مولانا عبدالرحمن جامی صاحب دامت برکاتہم
شیخ الحدیث جامعہ دارالعلوم رحیمیہ ملتان مدیر جامعہ حفصہ للبنات الاسلام
باسمہ تعالیٰ وتقدس
برادر عالی مرتبت پیکر علم وعمل مناظر ابن مناظر جانشین حضرت علامہ مولانا دوست محمد قریشی رحمہ اللہ تعالیٰ جناب مولانا محمد عمر قریشی زید مجدہم کی کتاب’’ عادلانہ جواب‘‘ نظر سے گزری آنکھوں کی تبرید وقلب کی تسکین کا ذریعہ بنی ،برادرموصوف میرے بچپن کے ہم پیالہ وہم نوالہ ،،تکمیل،، ودورہ حدیث،، کے ساتھی وتکراری ہیں۔ آپ کی قابلیت ذکاوت وفطانت میری آنکھوں کا مشاہدہ ہے۔ الولدسر لابیہ کا صحیح مصداق ہیں اپنے والد گرامی قدس سرہ کے تمام کمالات وصفات حسنہ اپنے اند ر سمولیئے ہیں۔ خوش الحان مبلغ،، بے مثال مدرس،، بے نظیر محقق ،،عظیم مناظر،، بلند پایہ مصنف،، ہیں ۔اپنے والد گرامی کی طرح اہل باطل کے نظریات کی تردیدحضرت قریشی صاحب کا بھی خصوصی امتیاز ہے ،،فرقہ لا مذہبیہ،، اہل بدعت ،،روافض ،،کے خلاف آپ کا قلم،، زبان ہر وقت متحرک رہتے ہیں۔
تازہ ترین تصنیف ایک گستاخ رسول اللہ صلی اللہ علیہ وسلم وگستاخ صحابہ رضوان اللہ علیہم وگستاخ ائمہ واولیاء ومحدثین رحمہم اللہ،، ملحدو لا مذہب چتروڑگڑھی،، کے گستاخانہ سوقیانہ جاہلانہ اعتراضات کے جوابات پر مشتمل ہے ۔جس میں برادر مصنف زید مجدہ نے انتہائی متانت وفطانت کے ساتھ ہر اعترض کے مسکت ودندان شکن دلائل سے مرصع جوابات دے کر اہل علم سے خوب تائید وتصویب ،تحسین ودعائیں وصول کی ہیں ۔دعا ہے خداوند قدوس حضرت قریشی صاحب کی زندگی میں برکت نصیب فرمائے اور دین متین کی مزید خدمت کی توفیق عطاء فرمائے۔ آمین
کتبہ عبدالرحمن جامی۔ دارالعلوم رحیمیہ ملتان۔۱۴۲۹۔۱۲۔۲۱

ازدفترمرکزیہ مجلس تحفظ ختم نبوت پاکستان
بسم اللہ الرحمن الرحیم
چند ماہ قبل جادۂ مستقیم سے منحرف مولوی احمد سعید ملتانی نے ایک کتاب ’’قرآن مقدس اور بخاری محدث‘‘کے نام سے لکھی جس میں اس نے نیچریت ورافضیت کا وتیرہ اختیار کرتے ہوئے امام بخاری ؒ ،رواۃ بخاری اور صحیح احادیث بخاری پر زہر اگلا ہے کیا خوب کہا
چوں خدا خواہد کہ پردہ کس درد
میلش اندر طعنۂ پاکاں زند
مناظر اہل سنت حضرت مولانا دوست محمد قریشی ؒ کے خلف الرشید حضرت مولانا محمد عمر قریشی صاحب مدظلہ نے ’’عادلانہ جواب‘‘کے نام سے منصفانہ جواب دے کر جمیع اہل السنۃوالجماعۃ کی جانب سے وکالت کا حق ادا کیا ہے اور آغاز کتاب میں دارالعلوم دیوبند کا فتوی( جس میں احمد سعید ملتانی کی مذمت کرتے ہوئے اسے ضال ومضل کہا گیا ہے )نقل کرکے کتاب کی عظمت کو اضعافاً مضاعفۃًکردیا ہے۔
اللہ تعالیٰ حضرت مولانا محمد عمر قریشی صاحب مدظلہ کی سعی کو مثمرا اور بارآور فرمائیں اور جمیع مسلمانوں اور انسانوں کے لئے باعث ہدایت بنائیں اور چتروڑی فتنہ سے ہم سب کو مأمون ومصون فرمائیں۔
آمین ثم آمین بحرمۃ خاتم الانبیاء والمرسلین صلی اللہ علیہ وسلم
غلام رسول دین پوری
خادم ختم نبوت دفتر مرکزیہ ملتان
۱۹،۱۲،۱۴۲۹

مناظر اسلام شاہین ختم نبوت حضرت مولانا اللہ وسایاصاحب مدظلہ
باسمہ تعالیٰ وتقدس
مخدومی ومخدوم زادہ مولانا محمد عمرقریشی زیدہ مجدہ
السلام علیکم ورحمۃاللہ وبرکاتہ مزاج گرامی
اس سال اللہ رب العزت نے حجاز مقدس جانے کی سعادت سے سرفراز فرمایا دوران سفر مولانا عبدالقیوم نعمانی کراچی نے آپ کی عادلانہ جواب کی اشاعت کی خوش کن خبر سے ممنون فرمایا۔
اسی وقت کتاب کے مطالعہ کا شو ق پیدا ہوا واپس آکر ہجوم کار نے گھیر لیا مگر۱۴جنوری کوروزنامہ اسلام میں اشتہار پڑھا تو لائبریری کے رفقاء سے کتاب کا معلوم کیا پتہ چلا آپ نے کتاب بھجوائی ہے بعد از عصر سے عشاء تک مکمل حرفاً حرفاً پڑھا آپ نے خوب تعاقب کیا بلکہ تعاقب کا حق ادا کردیا اور حضرت امام بخاری ؒ پر پڑے غبار کو صاف کیا اس خدمت جلیلہ پر مبارک قبول فرمائیں ۔
حق تعالیٰ آپ کی مساعی میں برکت نصیب فرمائیں اور ہر لحاظ سے اپنے گرامی قدر والد مرحوم کا ہمہ جہت جانشین بنائیں ،آمین
محتاج دعاء
فقیر اللہ وسایا
دفتر ختم نبوت ملتان
۱۵،۱،۲۰۰۹

شیخ الحدیث والتفسیر حاوی الاصول والفروع استاذ العلماء
حضرت مولانا منظور احمد صاحب نعمانی
جامعہ احیاء العلوم ظاہر پیر رحیم یار خان
تقریظ منظوم
ملحد وزندیق نے مجروح کی شان نبی ﷺ
اپنے باطن کی خباثت کو کیا اس نے عیاں
کفر کے ایجنٹوں کا کردار ایسا ہی رہا
دین کے داعی دفاع کرتے رہے ہیں ہر زماں
نوجوان فاضل قریشی پہ خدا راضی رہے
اس فریضے کو ادا کرکے ہوئے ہیں دلستاں
بالبراہیں عادلانہ کردیا کامل دفاع
شیر کا بیٹا یقیناہوتاہے شیرژیان
امت محبوب کے ہاتھوں میں دی تلوار تیز
جس سے گستاخوں کے سرکٹتے رہیں گے اور زبان
سر والد کا بھی تو نے حق ادا کرہی دیا
اے میرے لخت جگر نور نظر اور جان جاں
ہے دعا ہردم برائے عافیت علم وفضل
تاکہ ہم باری کریں باطل پہ منظور جہاں

خطیب اسلام جامع المحاسن حضرت علامہ
مولاناقاری محمد امداد اللہ صاحب قاسمی مدظلہ
خطیب جامع مسجد حمزہ برمنگھم (یوکے)
حامدًاومصلیاً امابعد۔
گذشتہ دنوں پاکستان کے بعض احباب نے امام بخاریؒ ، رواۃبخاری اور روایات بخاری شریف پر کیے گئے چون اعتراضات کامجموعہ بنام قرآن مقد س اوربخاری محدث پڑھنے کو پیش کی۔مطالعہ کیا جسمیں مؤلف نے سوقیانہ زبان ،گھٹیاانداز تحریراپناتے ہوئے امیر المحدثین حضرت امام بخاری رحمہ اللہ پرایسے غیر معقول اعتراضات کیے ہیں جن کاحقیقت سے دور کابھی واسطہ نہیں اور یہ وہ باتیں ہیں جوروافض اور منکرین حدیث ہمیشہ کرتے رہتے ہیں۔احمد سعید ملتانی نے انھیں کی چوری کی ہے کوئی نئی تحقیق وتتبع کار فرمانہیں البتہ بیہودہ طرز بیان وہ انھیں کی ذاتی کاوش ہے۔
حجیت حدیث کاانکار بہت پرانافتنہ ہے ۔جس کاامام اہل السنۃ والجماعۃ حضرت امام شافعی ؒ نے کتاب الام میں ،حافظ ابن قیم ؒ نے اعلام الموقعین میں ،امام غزالیؒ نے المستشفع میں ،شیخ محمد ابراہیمؒ نے الروض القاسم میں اور شیخ زفر یمانیؒ نے الحدیث والمحدثون میں دلائل قاطعہ اور براہین ساطعہ سے رد فرمایا ہے ۔
ماضی قریب میں عبداللہ چکڑالوی ،احمد دین امرتسری ،اسلم جیراجپوری ، اور غلام احمد پرویز نے جب اردوخواند ہ طبقہ کی نظر میں احادیث طیبہ کو مشکوک کرنے کی ناکام کوشش کی تو حضرات علماء اہل السنۃ والجماعۃنے اپنے اکابر کے نقش قدم پر چلتے ہوئے متانت وسنجیدگی کے ساتھ قرآن وسنت کی روشنی میں دشمن کی تمام سازشیں ناکام بنادیں
جب یہ کتاب(قرآن مقدس اور بخاری محدث) میرے ہاتھ میں تھی تو میں سوچ میں گم تھا کہ نظر قدرت اس کے دفاع کے لئے کسے منتخب فرماتی ہے ۔
الحمد للہ ثم الحمد للہ یہ جان کر خوشی ہوئی کہ رب العزت نے یہ عظیم کام برادرمکرم استاذ العلماء حضرت العلامہ مولانا محمد عمر صاحب قریشی مدظلہ کے ہاتھوں پایہ تکمیل کو پہنچایا
ایں سعادت بزور بازو نیست
تانہ بخشد خدائے بخشندہ
کتاب واقعی اسم بامسمیٰ ہے اصح الکتب بعد کتاب اللہ پر کئے گئے اعتراضات کا مفصل مدلل مسکت عادلانہ جواب ہے ۔
مولانا قریشی مدظلہ میرے دورہ حدیث مبارک کے ساتھی ہیں وہی مبنی بر اخلاص تعلق آج بھی قائم ہے ۔بارہا ان کے ہاں جامعہ فرقانیہ/ رحیمیہ دارالمبلغین کوٹ ادو میں حاضری ہوئی ہے امسال بھی درجہ قرآن کریم حفظ وناظرہ ودرجہ کتب سے فارغ ہونے والے طلباء کرام کی دستار بندی کی تقریب میں حاضری کی سعادت نصیب ہوئی ادارہ کی کارکردگی ہر اعتبار سے لائق تحسین ہے ۔
اللہ تعالیٰ مولانا قریشی صاحب مدظلہ کی اس تالیف کو اپنی بارگا ہ میں شرف قبولیت سے نوازیں ۔آمین
محمد امد اداللہ القاسمی
خطیب جامع مسجد حمزہ برمنگھم یو کے 30/8/2008



مناظراسلام وکیل احناف حضرت العلامہ
مولانامحمد منیر احمد منور صاحب مد ظلہ
استاذ التفسیر والحدیث باب العلوم کہروڑ پکا
و امیر اتحاد اہلسنت والجماعت پاکستان
نحمد ہ ونصلی علی رسولہ ا لکریم محمد وعلی آلہ وصحبہ اجمعین
امابعد
صراط مستقیم افراط وتفریط کے درمیان راہ اعتدال کا نام ہے اور یہی حق ہے اسی کے طلب کا حکم ہے اھدنا الصراط المستقیم اور اسی پر چلنے کا امر ہے وان ہذا صراطی مستقیماً فا تبعو ہ اسی نقطۂ اعتدال کو حکمت کہا گیا ہے ومن یوتی الحکمۃ فقد اوتی خیرا کثیرا جبکہ ہر چیز میں افراط وتفریط باطل ہے ۔
مثلاً باب عقائد میں بعض لوگوں کا عقیدہ ہے کہ انبیاء واولیاء ہر جگہ حاضر وناظر ہیں اور بعض لوگوں کا عقیدہ ہے کہ اللہ تعالیٰ بھی ہرجگہ حاضر وناظر نہیں ۔افراط وتفریط کے یہ دونوں راستے باطل ہیں۔ ان کے درمیان راہِ اعتدال اور صراط مستقیم یہ ہے کہ اللہ تعالیٰ ہرجگہ حاضر وناظر ہے مگراللہ تعالیٰ کے سوا کوئی بھی ہرجگہ حاضر وناظر نہیں ۔
بعض لوگوں نے معجزات وکرامت کو انبیاء واولیاء کا اختیاری فعل قرار دے کر انبیاء واولیاء کو مختار کل مان لیا جبکہ بعض لوگوں نے معجزات وکرامات کو شرک سمجھ کر ان کا انکار کردیا مگر یہ افراط وتفریط ہے جو باطل ہے ۔
صراط مستقیم یہ ہے کہ معجزہ وکرامت اللہ تعالیٰ کے اس خرق عادت فعل کا نام ہے جو نبی یا ولی کے ہاتھ پر ظاہر ہوتا ہے اس میں نبی یا ولی کے اپنے اختیار کا دخل نہیں ہوتااس لئے معجزہ وکرامت نہ شرک ہے اور نہ اس سے انبیاء واولیاء کا مختار کل ہونا ثابت ہوتا ہے ۔
ایک فریق نے بعض معجزات وکرامات کی وجہ سے انبیاء واولیاء کو عالم الغیب مان لیا اور اللہ تعالیٰ کے عالم الغیب ہونے کا انکار کردیا ۔دوسرے فریق نے ان معجزات وکرامات کا انکار کردیا جبکہ ا س افراط وتفریط کے درمیان صراط مستقیم یہ ہے کہ وہ معجزات وکرامات برحق ہیں مگر صفت عالم الغیب کا اطلاق صرف اللہ تعالیٰ پر ہوسکتا ہے غیر اللہ پر نہیں۔۔۔۔۔۔۔۔۔
ایسے ہی حدیث کے بارہ میں منکرین حدیث کا عقیدہ یہ ہے کہ حدیث نہ حجت ہے نہ اس کی ضرورت ہے صرف قرآن کافی ہے ۔جبکہ منکرین فقہ کاعقیدہ یہ ہے کہ ہر صحیح حدیث پر عمل کرنا ضروری ہے ۔اس افراط وتفریط کے درمیان راہِ اعتدال یہ ہے کہ حدیث حجت ہے اور فہم قرآن و فہم دین کے لئے بہت ضروری ہے لیکن ہر صحیح حدیث پر عمل ضروری نہیں بلکہ بعض حدیثوں پر عمل ہوتا ہے بعض پر عمل نہیں ہوتا جیسے منسوخ احادیث، پیغمبر ﷺ کی خصوصیات ومعجزات والی احادیث مبارکہ صحیح ہونے کے باوجود امت کے لئے ان پر عمل کرنا جائز نہیں ۔
منکرین حدیث نے صحیح بخاری کی صحت کو مشتبہ او ر مشکوک بنا دیا جبکہ منکرین فقہ نے صحیح بخاری کی صحت سند کو معیار بنا کر صحیح بخاری کی ہر حد یث کو معمول بہ قرار دے رکھا ہے۔ اس افراط وتفریط کے درمیان راہ اعتدال یہ ہے کہ صحیح بخاری کی احادیث مبارکہ سندًا صحیح ہیں مگر صحت سند ،صحت عمل ،کی دلیل نہیں ۔اس لئے صحیح بخاری کی بعض حدیثیں معمول بہ ہیں اور بعض غیر معمول بہ ہیں۔ جیسے بیت المقدس کی طرف منہ کرکے نماز پڑھنا ،رانیں کھلی کرنا،نمازمیں سلام کرنا،اسی طرح آپ ﷺ کی خصوصیات ومعجزات کی احادیث بھی معمول بہ نہیں پھر معمول بہ احادیث اور غیر معمول بہ احادیث کے جاننے میں جن شخصیات پر محدثین نے اعتماد کیا ہے ہمیں بھی انہی پر اعتماد کرنا چاہیئے۔ وہ مجتہدین او رفقہاء ہیں ۔
منکرین حدیث کے انکار حدیث کے مختلف انداز ہیں ایک یہ کہ فلاں حدیث قرآن کے خلاف ہے اور جو قرآن کے خلاف ہو وہ حدیث نہیں ہوسکتی ۔نبی پاک ﷺ کیسے قرآن کے خلاف حدیث بیان فرماسکتے ہیں ۔
گستاخ رسول چتروڑی نے اپنی منحوس کتاب قرآن مقدس او ربخاری محدث میں منکرین حدیث کی اسی قبیح روش کو اختیارکیا ہے ۔اور رافضیوں کی طرح امام بخاری اور بخاری کے بعض مسلّم رواۃ پر خوب تبرا کیا ہے۔ اور اس ’’ علمی بونے ‘‘ نے کود کود کر اچھل اچھل کر ان قد آور شخصیات کی پگڑیاں اچھالنے کی کوشش میں اپنے دین ایمان کو تباہ وبرباد کرلیا ہے۔ ان جبال علم کے ساتھ ٹکرانے سے ان کا تو کچھ بگڑا نہیں البتہ الامہ احمد سعید سے علمی خول اور علمی جھول اتر کر ان کا سراپا جہالت سامنے آگیا ہے ۔
احمد سعید کی اس جہالت وحماقت کے سامنے آجانے کے باوجود خطرہ موجود تھا کہ بعض کم فہم اور ظاہر بین کہیں دھوکہ میں آکر منکرحدیث نہ بن جائیں ۔اس لئے ضرورت تھی کہ اس کتاب کا جواب لکھ کر اس خطرہ سے عوام الناس کو بچایا جائے ۔
اللہ تعالیٰ جزائے خیر دیں امام المناظرین علامہ دوست محمد قریشی رحمہ اللہ کے مسند نشین حضرت مولانا محمد عمر قریشی صاحب زید مجدہ کو کہ انہوں نے اس کتا ب کا عادلانہ جواب لکھ کر بتا دیا ہے کہ احمد سعید نے بخاری شریف کی جن احادیث کوقرآن کے خلاف و متضاد دکھانے کی کوشش کی ہے وہ قرآن کے خلاف نہیں بلکہ احمد سعید نے قرآن وحدیث سے اپنی جہالت ،کج فہمی ،اور کم فہمی کی وجہ سے ان کو متضاد سمجھ لیا ہے ۔
حضرت قریشی زید مجدہ نے عادلانہ جواب لکھ کر جہاں سب علماء کی طرف سے فرض کفایہ ادا کیا ہے وہاں یہ کتاب علم وتحقیق کی دنیا میں ایک شاہکار کتاب ہے ۔ اس سے مولانا کی علمی استعداد ،وسعت مطالعہ ،اور دفاع دین کی قابلیت وجذبہ بھی نمایاں ہوتا ہے ۔
دعا ہے اللہ تعالیٰ اس علمی کاوش کو قبولیت تامہ و عامہ سے سرفراز فرماکر مولاناموصوف کے لئے نجات کا اور طالبین حق کے لئے ہدایت کا ذریعہ بنائیں ۔
آمین ثم آمین ۔
منیر احمد منور
استاذ التفسیر والحدیث باب العلوم کہروڑ پکا
و امیر اتحاد اہلسنت والجماعت پاکستان

j
حال دل
ملک کے مؤقر جریدہ ماہنامہ القاسم اور دیگر احباب کے ذریعہ قرآن مقدس اور بخاری محدث مصنفہ احمد سعید ملتانی کا تذکرہ پڑھا ،سنا ۔دیکھنے کو جی چاہا تلا ش بسیار کے باوجود کتاب نہ مل سکی۔ جب قدرت مہربان ہوئی تو خطیب اسلام برادر مکرم حضرت مولانا مفتی محمد شفیع صاحب مدظلہ جنرل سیکرٹری تنظیم اہل السنۃ پاکستان نے ازخود کرم نوازی فرمائی اور ہدیۃً وہ کتاب بھیج دی۔
ان دنوں مسئلہ طلاق ثلاثہ پر تحقیقی کام کی مصروفیت کے سبب تفصیلی مطالعہ نہ کرسکا اس سے فارغ ہونے کے بعد کتاب کو دیکھا، مطالعہ کیا۔ آنکھ کھلی کہ ہمارے ملک اور ہماری صفوں میں بھی
لباس خضر میں ہزاروں رہزن پھرتے ہیں۔
احمد سعید چتروڑی ملتانی نے ایک صد پچیس صفحات کی کتاب میں امیر المؤمنین فی الحدیث امام بخاری رحمہ اللہ ،رواۃ بخاری ،احادیث بخاری کے ساتھ ساتھ اللہ کے محبوب پیغمبر صلی اللہ علیہ وسلم اور ان کے اصحاب رضوان ا للہ علیہم اجمعین کو بھی معاف نہ کیا (نعوذ باللہ من ذالک )
طرز تحریراور اندازیہ اپنایا کہ قرآن مقدس کا عنوان قائم کرکے قرآنی آیات کی تفسیرمن چاہے اندازمیں کی گئی اور پھر بخاری محدث کے عنوان کے تحت بخاری شریف سے روایات نقل کرکے ان کا بھی اپنی ناقص عقل ودانش کے مطابق مفہوم متعین کیا ،بعدہ دونوں میں تقابل وتعارض ثابت کرکے جو دل میں آیا سو لکھا۔
تفصیل تو انشاء اللہ آنے والے صفحات میں ملاحظہ فرماویں گے بطور نمونہ پڑھ سن لیں
امام الانبیاء صلی اللہ علیہ وسلم کی شان میں گستاخی
1 ۔۔۔ بخاری اپنی روایت کے ذریعہ آپ ا کا نابالغہ لڑکیوں کے ساتھ جنسی کھیل کھیلنا ثابت کرتے ہیں ۔۔۔۔۔۔آپ ا نعوذ باللہ ان سے جنسی کھیل رچائیں اور طبع آزمائی میں مشغول ہوجائیں۔ صفحہ [۵۷۔۵۸]
2 ۔۔۔ایسا کام تو کوئی چنڈ و باز بھی نہیں کرتا اللہ کے پیغمبر سے کس طرح ممکن تھا۔صفحہ [۷۰]
3 ۔۔۔ابن ام مکتوم کے کہنے پر اللہ کے رسول ا نے از خود آیت میں لکھوادیا۔ لاحول ولا قوۃ۔ صفحہ [۱۰۶]
4 ۔۔۔ آپ ا میں جولاادری کا اندھیراتھا تو جبرائیل کی پڑھائی سے دور ہورہا ہے۔ صفحہ [۸۸]
صحابی رسول اکی گستاخی
صحابی رسول ا حضرت نعمان رضی اللہ عنہ اور ان کی بیٹی منکوحہ رسول اللہ ا کے متعلق لکھتا ہے
وہ کافرہ اورکافر کی بیٹی تھی صفحہ[ ۷۰]
حدیث رسول ا کے خلاف
کافروں کاقدیم زمانہ سے پیشہ چلا آرہا ہے پڑھنے والا اپنا فریضہ ادا کررہا ہو۔۔۔اس کے عین مقابلہ میں نعت خوانی دوہڑا بازی شروع کردے گا یا قا ل قال رسول اللہ کی لڑھ مچادے گا ۔صفحہ [۸۷]
ان عبارات کو پڑھ کر ارادہ ہوا کہ حتی الوسع خدمت حدیث کی جائے مگر اتناعلمی تحقیقی بوجھ اور میرے علمی طور پر ناتواں کندھے، کوئی مناسبت نظر نہ آئی یہ بھی معلوم ہوا کہ علماء کرام مختلف مقامات پر اس کے جواب لکھنے میں مصروف ہیں تو ارادہ تقریباً ترک کردیامگر انہی دنوں میں خواب دیکھا( تفصیل تو نہیں لکھ سکتا) جس میں جواب لکھنے کا حکم ہوا قلم سنبھالا ہمت پکڑی اکابر سے دعائیں لیں اور جواب لکھنا شروع کردیا ۔
میرے عزیز مفتی محمد صادق صاحب کی محنت لائق صد ستائش ہے حوالہ جات کی تلاش میں بہت زیادہ تعاون کیا ۔اللہ انہیں جزائے خیر عطافرماویں
یقین فرمایئے اس جواب لکھنے کی غرض صرف اور صرف اپنی قبر اورآخرت سنوارنا ہے اللہ تعالیٰ میری اس خدمت کو منظور فرماکر ذریعہ نجات بنا دیں میرے گناہ معاف فرماویں اور دنیا وآخرت کی بھلائیاں نصیب فرماویں۔آمین ثم آمین
بات کو آسان سے آسا ن کرنے کی حد درجہ کوشش کی گئی ہے ۔اَ لاَّمَہ احمد سعید کی تصنیف قرآن مقد س اور بخاری محدث کے تعارضات عموماً ملخصاً نقل کیئے گئے ہاں کہیں کہیں مکمل طور پر یا اکثر حصہ بھی نقل کردیا گیا ہے
حوالہ جات کے نقل کرنے میں پوری احتیاط سے کا م لیا گیا ہے مگر پھر بھی غلطی خارج از امکان نہیں ۔مطلع کرنے پر خوشی ہوگی
محمد عمر قریشی عفا اللہ عنہ
خادم مدرسہ فرقانیہ دارالمبلغین کوٹ ادو مظفر گڑھ








مقدمہ
P
اصطلاح محدثین رحمہم اللہ میں حدیث کی تعریف اقوال النبی وافعالہ و احوالہسے کی جاتی ہے۔ کیونکہ محد ث کی غرض آنحضرت اکے تمام منتسبات ومضافات خواہ وہ اقوال ہوں ،یا احوال ہوں ۔اختیاریہ ہوںیاغیراختیاریہ ہوں ان سب کوجمع کرکے امت تک پہنچانا ہوتی ہے
اس علم شریف کا موضوع ذات النبی ﷺ من حیث الرسالۃ اور غرض اس کی اپنی زندگی کے ہرشعبہ میں آنحضرت اکی سنت طیبہ پر عمل کرکے رضاء خداوندی اور سعادت ابدیہ کو حاصل کرنا ہے۔
اسکی شرافت وعظمت سمجھنے کے لئے اس قدر کافی ہے کہ حدیث اس ذات والاصفات سے صادرہونے والے امور کا نام ہے جس کا مقام وماینطق عن الھوی* ان ہوالا وحی یوحٰی ہے ۔
یاد رکھیں علم قرآن اگر اسلامی ودینی علوم میں بمنزلہ قلب ہے توعلم حدیث کو شہ رگ کی حیثیت حاصل ہے ۔کیونکہ آیات طیبات کا شان نزول ان کی تفسیر ،قرآنی احکام کی توضیح، عموم کی تخصیص، مبہم کی تعیین وغیرہ علم حدیث کی مرہون منت ہیں۔
بلکہ حامل قرآن حضور اکرم صلی اللہ علیہ وسلم کی سیرت طیبہ اور اخلاق کریمانہ امت تک اسی علم حدیث کے ذریعہ پہنچتے ہیں ۔نیز حضرت صلی اللہ علیہ وسلم کے ارشاد گرامی ترکت فیکم امرین لن تضلواماتمسکتم بہما کتاب اللہ وسنۃ رسولہ۔ [مشکوٰۃ۔صفحہ[۳۱ ]
میں نے تمھارے اندر دو چیزیں چھوڑی ہیں جب تک ان کو مضبوطی سے پکڑے رہوگے گمراہ نہ ہوگے کتاب اللہ اور سنت رسول اللہا ۔
اس سے یہ حقیقت واضح ہوکر سامنے آگئی کہ
1 ۔۔۔قرآن کریم اور سنت نبی اقیامت تک سرچشمہ ہدایت رہنیگے۔
2 ۔۔۔اسلام کی صحیح تصویر اور اسلام کی صحیح تعلیم قرآن وسنت کی باہمی تطبیق سے حاصل ہوگی۔
جس قادر مطلق نے قرآن کریم کی حفاظت کرنی ہے احادیث طیبہ کی حفاظت بھی اسی کے ذمہ ہے۔ اگر کسی نے ان کو ایک دوسرے سے الگ کرنا چاہا تو وہ شخص صراط مستقیم سے کوسوں دور ہوگا ۔تاریخ اسلام پر نظر رکھنے والا اچھی طرح جانتا ہے کہ اسلام میں بدعتی فرقے پیدا ہونے کا سبب قرآن وسنت میں تفریق وتحریف ہے ۔
قدیم باتیں چھوڑیئے آج بھی صرف قرآن کریم کو ہر ضرورت کا حل اور ہر مسئلہ کے لئے کافی اور اپنی عقل وفہم کو اسکی تشریح کے لئے کافی تر سمجھنے والوں نے حجیت حدیث ، حیات برزخی، شفاعت پیغمبر اور معجزات کا انکار کردیا۔ جس طرح ایک جماعت صرف حدیث کا نعرہ لگا کر فقہ سے ہاتھ دھو بیٹھی ہے اسی طرح منکرین حجیت حدیث نے بھی صرف قرآن کا نعرہ لگا کر احادیث مبارکہ کے پورے ذخیرہ کو ناقابل اعتماد بنانے کی ناکام سعی کی ہے ۔بعض کو یہ کہتے بھی سنا گیا کہ حدیث وتاریخ کی ایک ہی حیثیت ہے۔
اناللہ واناالیہ راجعون حالانکہ
1 ۔۔۔حدیث ایک ذات واحدسے متعلق حالات وواقعات کانام ہے جن کو جمع کرناآسان ہے جبکہ تاریخ میں منتشر ومختلف اشخاص کے حالات کو جمع کیا جاتا ہے جو بہت مشکل ہے۔
2۔۔۔حدیث پاک کو روایت کرنے والے اصحاب رسول ا موقع کے گواہ ہیں جبکہ تاریخ میں موقع کا گواہ اول تو ہوگانہیں اگر ہوگا توایک یا دو۔
3۔۔۔تاریخی واقعہ کے راوی تین سے زائد نہیں ملتے جبکہ احادیث کے راوی ایک لاکھ سے زائد نفوس قدسیہ ہیں۔
4۔۔۔تاریخ کے راوی کو بجز حالات وواقعات بیان کرنے کے اصل واقعہ وشخص سے کوئی دلچسپی نہیں ہوتی ہے جبکہ حدیث کے راوی وہ ہیں جنہوں نے حضرت اپر جان، مال ، اولاد ،عزت، وطن سب کچھ قربان کردیا۔
میرے ان معروضات کا خلاصہ یہ ہے کہ قرآن وحدیث میں چولی دامن کا ساتھ ہے حدیث کی حجیت قرآن بیان کرتا ہے تو قرآن کی تفسیر وتشریح حدیث رسول اللہا بیان کرتی ہے۔
حجیت حدیث کے دلائل قرآن مجید سے
1 ۔۔۔وماکان لمؤمن ولا مؤمنۃ اذا قضی اللہ ورسولہ امراً ان یکون لہم الخیرۃ من امرہم ومن یعص اللہ ورسولہ فقد ضل ضلالاً مبینا [النساء ]
2 ۔۔۔اناانزلناالیک الکتاب بالحق لتحکم بین الناس بما اراک اللہ
3۔۔۔فلاوربک لایؤمنون حتی یحکموک فی ماشجر بینہم ثم لا یجدوا فی انفسہم حرجاًمما قضیت ویسلموا تسلیماً
4 ۔۔۔من یطع الرسول فقد اطاع اللہ
5 ۔۔۔ومااتٰکم الرسول فخذوہ ومانہکم عنہ فانتہوا [حشر]
6 ۔۔۔قاتلوا الذین لا یؤمنون باللہ ولا بالیوم الاخر ولا یحرمون ماحرم اللہ ورسولہ [توبہ]
7۔۔۔وانزلناالیک الذکرلتبین للناس مانزل الیہم ]نحل[
8 ۔۔۔وان تطیعوہ تھتدوا [نور]
ان آیات مبارکہ نے جہاں حیثیت نبوی اکو واضح فرمایاوہاں اقوال وافعال واحوال کی حجیت کو بھی نہایت صراحت سے بیان کیا ہے
وہ آیات مقدسہ جن کا مطلب سمجھنا احادیث پر موقوف ہے
1۔۔۔الاتنصروہ فقد نصر ہ اللہ اذاخر جہ الذین کفروا ثانی اثنین اذہما فی الغار
2۔۔۔ عبس وتولی ان ج�أہ الاعمٰی
3 ۔۔۔والذین اتخذوا مسجدًا ضِررًا وکفرًا وتفریقا بین المؤمنین [ الایۃ ]
4ٰ۔۔۔ وعلی الثلاثۃ الذین خلفواحتی اذا ضاقت علیہم الارض بما رحبت وضاقت علیہم انفسہم [الایۃ ]
5 ۔۔۔ولا تصل علی احد منہم مات ابداً [الایۃ ]
6۔۔۔یاایہاالذین آمنوااذانودی للصلوھ من یو م الجمعۃ [الآیۃ]
ان آیات طیبات میں بھی اہم واقعات واحکام کی طرف اشارہ ہے جن کو سمجھنے کے لئے احادیث رسول اللہ ا کے بغیر چارہ نہیں
تاریخ علم حدیث
عرب فطرتًا قوی الحافظہ ہونے کے سبب لکھنے پر حفظ کرنے کو ترجیح دیتے تھے بلکہ پہلی صدی ہجر ی تک علماء عرب عام طور پر کتابت پر زیادہ توجہ کو بنظر تعجب دیکھا کرتے تھے تاہم یہ بھی نہیں کہا جاسکتا کہ عہد نبوت امیں حدیث پاک کی مطلقاً کتابت ہی نہیں کی گئی کیونکہ حضرت عبداللہ بن عمرو Z کے پاس ایک ہزار احادیث کا لکھا ہوا مجموعہ موجود تھا جس کا نام الصادقہ تھا ۔
1۔۔۔سنن دارمی جلد[۱]صفحہ [۱۳۶]پر ہے حضرت عبداللہ بن عمروZ فرماتے ہیں
میں حضرت اکی ہربات لکھ لیتا تھا ۔مجھے بعض احباب نے کہا
تکتب کل شئیسمعتہ من رسول اللہ ورسول اللہ بشر یتکلم فی الغضب والرضاء فامسکت عن الکتابۃ
آ پZ حضرت اسے ہر سنی بات نوٹ کرلیتے ہوحالانکہ حضرت ا کبھی ناراض ہوتے ہیں،کبھی خوش ہوتے ہیں تو میںیہ سن کر لکھنے سے رک گیا ۔
ایک دن یہی بات حضرت ا کی خدمت اقدس میں گذارش کردی تو آپ ا نے اپنے منہ مبارک کی طرف اشارہ کرتے ہوئے فرمایا اکتب فوالذی نفسی بیدہ ماخرج منہ الا حق لکھا کر مجھے اپنے اللہ کی قسم میرے منہ سے بجز سچ وحق کے کچھ نہیں نکلتا ۔
2۔۔۔حضرت ابوھریرہ Zفرماتے ہیں کوئی بھی صحابی رسول ا مجھ سے زیادہ احادیث بیان کرنے والا نہیں ۔سوائے عبداللہ بن عمرو کے کیونکہ وہ لکھتے تھے ۔
لیس احد من اصحاب رسول اللہ اکثر حدیثاً عن النبی ﷺ منی الا ماکان من عبدا للہ بن عمرو فانہ کان یکتب ولا اکتب سنن دارمی جلد [۱]صفحہ [۱۳۶]
3۔۔۔حضرت سیدنا علی المرتضٰی رضی اللہ عنہ کے پاس احادیث کا لکھا ہوا مجموعہ تھا جس میں دیت اور دیگر مسائل موجود تھے۔
عن ابی جُحیفۃ قال قلت لعلیؓ ہل عندکم کتاب قال لا الا کتاب اللہ اوفہم اعطیہ رجل مسلم اومافی ہذہ الصحیفۃ قال قلت ومافی ہذہ الصحیفۃ قال العقل وفکاک الاسیر ولا یقتل مسلم بکافر ۔
بخاری جلد [۱]صفحہ [۲۱]
4۔۔۔ حضرت ابو ھریرہ Zکے شاگر درشید جناب بشربن نَھِیک فرماتے ہیں
کنت اکتب مااسمع من ابی ھریرۃؓفلمااردت ان افارقہ اتیتہ بکتابہ فقرأت علیہ وقلت ہذا ماسمعت منک قال نعم ، سنن دارمی جلد[۱]صفحہ[۱۳۸]
میں جو احادیث حضرت ابوھریرہZ سے سنتا لکھتا جاتا جب درس مکمل کرکے آنے لگا تو میں نے وہ لکھا ہوا مجموعہ حدیث پڑھ کر سنایا اور یہ بھی عرض کیا ہذا سمعت منک یہ وہ حدیثیں ہیں جومیں نے آپ سے سنی ہیں آپ Z نے مہر تصدیق ثبت کرتے ہوئے فرمایا نعم جی ہاں
5۔۔۔حضرت ابن عمرZ فرماتے تھے۔
قیدوا ہذاالعلم بالکتاب۔
سنن دارمی جلد[۱]صفحہ[۱۳۸]
ان حوالہ جات سے میرے مدعی کی تصدیق ہوگئی کہ آنحضرت ااور دور صحابہ میں بھی حدیث لکھے جانے کے واقعات ملتے ہیں۔ ہاں زیادہ تر توجہ حفظ کی طرف تھی ۔
کیا حفظ کے سلسلہ میں عقل پر اعتماد کیا جاسکتا ہے؟
میرے محترم دوستو :۔
اللہ رب العزت نے اس امت پر جہاں دیگر انعامات فرمائے ہیں ان میں سے ایک قوت حافظہ بھی ہے۔
1۔۔۔حضر ت قتادہ فرماتے ہیں
اعطی اللہ ہذاالامۃ من الحفظ مالم یعط احدا من الامم خاصۃخصہم اللہ بہا:
زرقانی بحوالہ تدوین حدیث صفحہ[۹۸]
2۔۔۔حضرت سیدنا ابوھریرہ Zفرماتے ہیں
فمانسیت شیئاحدثنی بہ
اسد الغابہ جلد [۶]صفحہ[۳۱۴]
3 ۔۔۔حضرت قتادہ، حضرت سعید بن المسیب Zکی خدمت میں مدینہ طیبہ حاضر ہوکر اخذ فیض کرنے لگے حضر ت قتادہ مسئلہ پر مسئلہ پوچھتے رہے اور سوال پر سوا ل کرتے رہے۔کچھ دن تو حضرت سعید Zخاموش رہے آخر ایک دن فرمایا جو کچھ سن چکے ہو اسے یاد کرلیا ؟
جواباً حضرت قتادہ نے عر ض کی سألتک عن کذافقلت فیہ کذا وسألتک عن کذا فقلت فیہ کذامیں نے فلاں سوال کیاتھا آپ نے فلاں جواب دیاتھا۔میں نے فلاں سوال کیاتھاآپ نے فلاں جوابدیاتھا۔بالآخرحضرت سعیدZنے فرمایاماکنت اظن ان اللہ خلق مثلک میں نہیں سمجھتا تھا اللہ تعالیٰ نے آپ جیسا انسان بھی پیدا فرمایا ہے ۔
طبقات ابن سعد جلد [۵]صفحہ ۲۶۴]
4 ۔۔۔حضرت امام بن راہویہؒ آپ علم حدیث میں بلند پایہ امام ہیں حفظ وضبط میں ضرب المثل تھے ایک مرتبہ عبداللہ طاہر کا امیر خراسان کی دربار میں کسی عالم سے مناظرہ ہوگیا اثناء گفتگو ایک کتاب کی عبارت پر اختلاف ہوا ۔
آپ نے امیر خراسان سے کہا کتب خانہ سے فلاں کتاب اٹھاؤ کتاب آگئی آپ نے فرمایا عد من الکتاب احدی عشرۃ ورقۃ ثم عد سبعۃ اسطر کتاب کے گیارہ ورق شمار کریں اوراسکی ساتویں سطر ملاحظہ کریں جب دیکھا گیا تو ابن راہویہ کی بات من وعن موجودتھی امیر نے آ پ سے مخاطب ہوکر فرمایا علمت انک تحفظ المسائل ولکنی اعجب لحفظک ہذا المشاہدۃ
یہ تو میں جانتا تھا آپ کو مسائل ازبر ہیں مگر آپ کی قوت حافظہ کے اس مشاہدہ نے مجھے حیرت زدہ کردیا ہے ۔تاریخ دمشق ۔ابن عساکر
5۔۔۔دور نہ جائیے جب مرزائیت کے خلاف مشہور مقدمہ بہاول پور میں آیۃ من آیات اللہ سیدی وسندی حضرت اقدس سید محمد انور شاہ کشمیری تشریف لائے تو مرزائی نے فواتح الرحموت شرح مسلم الثبوت کی عبارت پیش کرکے پورے ہال کو ورطہ حیرت میں ڈال دیا۔
اس وقت محدث جلیل حضرت کشمیری رحمہ اللہ نے فرمایا جج صاحب آج سے بتیس سال پہلے میں نے یہ کتاب دیکھی تھی فریق مخالف عبارت میں دھوکہ دے رہا ہے اسے کہو اصل عبارت پڑھے جب جج کے کہنے پر مکمل عبار ت پڑھی گئی تو عبارت کا مفہوم وہی تھا جو حضرت شاہ صاحب نے بیان فرمایا ۔گویا بتیس سال پہلے کی بات یادتھی۔
ایسے محیر العقول واقعات سے کتب لبریز ہیں متقدمین ومتأخرین میں ایسے نفوس قدسیہ کی کمی نہیں ۔
احتیاط فی الحدیث
1 ۔۔۔حضرت شعبہ رحمہ اللہ فرماتے ہیں۔
کان لا یرضی الا یسمع الحدیث عشرین مرۃ
جب تک حضرت ا کی حدیث بیس مرتبہ نہ سن لیتے چین نہ آتا۔
2 ۔۔۔حضرت معن فرماتے ہیں۔
امام مالک سے جتنی روایت بیان کرتا ہوں قد سمعتہ منہ نحواً اواکثر من ثلثین مرۃ
3 ۔۔۔حضرت ابراہیم فرماتے ہیں۔
کل حدیث لا یکون عندی من ماءۃ وجہ فانا فیہ یتیم
تفصیل تو بڑی کتب میں لکھی جاتی ہے یہ مختصر تالیف ہے سب کا احاطہ مشکل ہے بتانایہ چاہتا ہوں حضرت پاک ا اور اصحاب رسول اکے زمانہ میں بھی حدیث کی کتابت کیجاتی تھی ان لوگوں کاحافظہ بے مثال تھا نیز یہ حضرات احتیاط فی الحدیث کا حق ادا فرماتے تھے۔
یوں تو اس علم وفن کی خدمت میں ہزاروں نام آتے ہیں آتے رہینگے مگر میں نے اس مقام پر کچھ تذکرہ خیر امیر المؤمنین فی الحدیث امام محمد بن اسماعیل بخاری نور اللہ مرقدہ کا کرنا ہے۔
امیر المؤمنین فی الحدیث حضرت امام محمد بن اسماعیل بخاری نور اللہ مرقدہ
اسم گرامی ابو عبداللہ محمد بن اسماعیل بخاری
ولادت ۱۳ شوال ۱۹۴ھ بروز جمعہ
وفات ۲۵۶ ھ بعد نماز عشاء
آپ نے ابتدائی تعلیم والدہ محترمہ کی زیر نگرانی حاصل کی بخارا میں امام داخلی کے تشریف لانے کے سبب ان کی خدمت بھی آنا جانا رہا جب آپ کی عمر سولہ سال کی ہوئی امام عبداللہ بن مبارک(تلمیذامام اعظم امام ابو حنیفہؒ ) کی کتب یاد تھیں ۔ تحصیل علم کے سلسلہ میں مصر، شام، حجاز، بغداد، بصرہ اوربے شمار مرتبہ کوفہ کے اسفار فرمائے۔
شیوخ واساتذہ کی تعداد ایک ہزار سے زائد لکھی گئی ہے۔
فائدہ
ثلاثیات بخاری میں سے ۲۰ حدیثیں حنفی شیوخ سے روایت کی گئی ہیں حضرت مکی بن ابراہیم سے گیارہ۔ ابو عاصم النبیل سے چھ۔ اور محمد بن عبداللہ انصاری سے تین ۔
انوار الباری جلد[۲]صفحہ [۲۱۹]
قوت حافظہ کے چند واقعات
1 ۔۔۔حاشد بن اسماعیل رحمہ اللہ فرماتے ہیں ۔
امام بخاری رحمہ اللہ میرے ساتھ مشائخ کی خدمت پڑھنے گئے ۔نہ قلم ،نہ دوات، نہ کاغذ۔ایک دن میں نے کہا جب آپ احادیث لکھتے نہیں تو پھر آپ کے پڑھنے کاکیا فائدہ؟
حضرت امام بخاری رحمہ اللہ نے فرمایا لکھے ہوئے رجسٹر نکالو میں تمہیں ترتیب وار احادیث یاد سناتا ہوں۔حاشد فرماتے ہیں سولہ دن کا سبق پندرہ ہزار حدیثیں آپ نے یاد سنادیں بلکہ ہم نے اپنے نوشتوں کی تصحیح کی۔
2 ۔۔۔جب آپ بخارا تشریف لائے تو چار صد علماء نے بغرض امتحان ایک سو احادیث کے متون واسانید میں غیر معمولی تغیر کرکے امام بخاری رحمہ اللہ کے سامنے پیش کیئے مگر امام بخاری رحمہ اللہ نے منٹوں میں وہ گتھی سلجھادی۔
3 ۔۔۔حضر ت امام اسحاق بن راہویہ
امام بخاری سے اپنی نسبت فرمانے لگے میں ایسے آدمی سے واقف ہوں جس کے دماغ میں ستر ہزار حدیث محفوظ ہے ۔آپ نے فرمایا اس نگار خانہ میں ایک اور شخص ہے جو دولاکھ حدیث پر عبور رکھتا ہے۔ ہوسکتا ہے اسی وقت اتنی یاد ہوں ورنہ علماء نے لکھا ہے کہ آپ کو چھ لاکھ سے زائد احادیث یاد تھیں۔
یوں تو امام بخاری کی تصنیفات کی تعداد پچیس سے زائد ہے مگر قدرت نے جو شہرت ومقبولیت بخاری شریف کو عطاء فرمائی وہ اپنی مثال آپ ہے۔ تقریباً ۲۱۷ھ میں جب آپ کی عمر ۲۳ سال کے قریب تھی اس کتاب کی تصنیف کا آغاز کیا ۔
آپ خود فرماتے ہیں میں نے الجامع الصحیح کو بیت الحرام میں تصنیف کیا اور تراجم ابواب مسجد نبوی ا میں منبر شریف اور روضہ اقدس کے درمیان لکھے ۔
بقول علامہ نووی بخاری شریف میں[ ۷۲۷۵ ]احادیث موجود ہیں اس کی عنداللہ مقبولیت کا اندازہ اس سے بھی لگایا جاسکتا ہے
1۔۔۔ اس کے ایک سو سے زائد شروحات وحواشی لکھے جاچکے ہیں اور ابھی بھی خدمت جاری ہے۔
2 ۔۔۔نوے ہزار محدثین نے آپ سے (امام بخاری ) بلا واسطہ بخاری شریف سنی
3۔۔۔ابویزید مروزی فرماتے ہیں خواب میں حضور ا کی زیار ت نصیب ہوئی آپ ا نے فرمایا ۔ابو یزید ہماری کتاب کا درس کیوں نہیں دیتے ؟میں نے عرض کی جنا ب کی کتاب کون سی ہے تو حضرت اکی ذات بابرکات نے فرمایا محمد بن اسماعیل کی الجامع الصحیح۔ سبحان اللہ سبحان اللہ (ملخصاً ازحالات مصنفین مولانا گنگوہی )
اکابر علماء امت اور امام بخاری رحمہ اللہ
1 ۔۔۔محدث جلیل امام ابو اسحاق فرماتے ہیں
من ارا دان ینظر الی فقیہ بحقہ وصدقہ فلینظر الی محمد بن اسماعیل
اگر کسی نے حقیقی فقیہ دیکھنا ہو تو امام بخاری کو دیکھے
2۔۔۔یحیٰی بن جعفر فرماتے ہیں
لو قدرت ان ازید فی عمرمحمد بن اسماعیل من عمری لفعلت فان موتی یکون موت رجل واحد وموتہ ذہاب العلم
اگر میری عمر کا کچھ حصہ امام بخاری کو مل سکتا تو میں ضرور انہیں دیتا کیونکہ میری موت ایک آدمی کی موت ہے اور ان کی موت سے علم جاتا رہے گا۔
3۔۔۔حضرت عبدان فرماتے ہیں
مارأیت بعینی شاباً ابصر من ہذا واشارالی محمد بن اسماعیل
میری آنکھ نے امام بخاری سے بڑھ کر صاحب بصیرت عالم نہیں دیکھا۔
4 ۔۔۔حضرت نعیم بن حماد فرماتے ہیں
محمد بن اسماعیل فقیہ ہذہ الامۃ
امام بخاری اس امت کے بڑے فقیہ ہیں
5۔۔۔حضرت علی بن حجر فرماتے ہیں
خراسان نے تین عالم پیدا کیئے ہیں ۔ابوزرعہ ۔محمد بن اسماعیل۔ عبداللہ بن عبدالرحمان دارمی مگر محمد عندی ابصر ہم واعلمہم وافقہہم مگر ان میں سے امام بخاری بڑے فقیہ عالم اور صاحب بصیرت تھے ۔
6۔۔۔امام بخاری کی تشریف آوری پر امام بغداد فرمانے لگے
الیوم دخل سید الفقہاء۔ آج سید الفقہا تشریف لائے
7۔۔۔حضرت ابو عمار حضرت امام بخاری کی تعریف کرتے ہوئے فرماتے ہیں ۔
لا اعلم انی رأیت مثلہ کانہ لم یخلق الاللحدیث
میں نے ان جیسا عالم نہیں دیکھا معلوم ہوتا ہے اللہ نے انہیں پیدا ہی خدمت حدیث کے لئے کیاتھا۔
8۔۔۔حضرت محمد بن بشار فرماتے ہیں
لم یدخل البصرۃ رجل اعلم بالحدیث من اخینا ابی عبداللہ
بصرہ میں امام بخاری سے بڑے حدیث کے عالم نہیں آئے
9۔۔۔حضرت قتیبہ بن سعید فرماتے ہیں۔
نظرت فی الحدیث ونظرت فی الرأی وجالست الفقہا والزہاد والعباد مارأیت منذعقلت مثل محمد بن اسماعیل
میں نے محدثین وفقہا اور اولیاء اللہ میں نظر ڈالی ہے مگر امام بخاری سے بڑ ا آدمی نہیں دیکھا۔
ان مشائخ وبزرگان دین نے اپنے اپنے دور کے مطابق اور اپنی معلومات کے مطابق بڑے احسن انداز میں حضرت امام بخاری رحمہ اللہ کو خراج تحسین پیش فرمایاہے ۔
J۔۔۔آخر میں علامہ جرجانی کی بات نقل کرتا ہوں۔
فرماتے ہیں میں نے عبدالواحد بن آدم الطواویسی سے سنا فرماتے تھے میں نے خواب میں حضرت پاک ا کومع اصحاب دیکھا وہ ایک جگہ پر منتظر کھڑے ہیں میں نے گذارش کی ماوقوفک یارسو ل اللہ قال انتظر محمد بن اسماعیل البخاری حضرت ا کیوں کھڑے ہو ؟آپ ا نے فرمایا محمد بن اسماعیل بخاری کی انتظار ہے
شیخ عبدالواحد بن آدم فرماتے ہیں کچھ دن بعد اما م بخاری کے سانحہ ارتحال کی خبر ملی میں نے حساب لگایا تو قدمات فی الساعۃ التی رأیت النبی ﷺ فیھا
[سیر اعلام النبلاء جلد[۳]
مگر افسوس صدافسوس
ہمارے وطن عزیز مملکت خدا داد پاکستا ن میں گذشتہ دنوں ایک کتاب بنام قرآن مقدس اور بخاری محدث شائع ہوئی(جس کے مؤلف احمد سعید ملتانی ہیں اور ناشر محمد منظور معاویہ خادم مرکزی اشاعت التوحید والسنۃ لکھا ہوا ہے )
اس کتاب میں دل کھول کر امیر المؤمنین فی الحدیث حضرت امام بخاری رحمہ اللہ ، رواۃ بخاری رحمہم اللہ اور احادیث بخاری پر بازاری زبان، آوارہ قلم، بے ہودہ طرز تحریر سے جارحانہ، ظالمانہ ،بے رحمانہ حملے کئے گئے ۔ ملاحظہ فرماویں
امام بخاری کے خلاف
{1}۔۔۔بخاری ضعیف فی الحدیث اور متعصب ہے ۔
قرآن مقدس اور بخاری محدث۔۔۔ صفحہ [۱]
{2} ۔۔۔غالباً امام بخاری کو تعصب نے اپنے اساتذہ اور شاگردوں سے الگ اور اکیلا کردیا ۔۔۔۔ صفحہ [۲]
{3}۔۔۔ان کی روایات قرآن کے خلاف واقع ہوئی ہیں۔۔۔ دوسرے محدثین کی ہزاروں غلطیوں پر بھی ایک غلطی امام بخاری کی بھاری ہے۔۔۔۔ صفحہ[۴]
{4}۔۔۔اب دیکھوایسی غلطی کسی دوسرے محدث نے کی ان کی ہزارہا غلطیوں پر بھی ان کی ایک غلطی بھاری ہے ۔۔۔۔ صفحہ[۴]
{5} ۔۔۔امام بخاری جس طرح سب سے بڑا سرتاج محدثین ہے ان کی غلطی بھی ہوگی تو تمام غلطیوں کی سرتاج ہوگی۔ ۔۔۔ صفحہ [۴]
{6}۔۔۔اس قدر قرآن کے مفہوم میں بصیرت حاصل کرنے کی سعی مشکور نہ فرمائی ۔ ۔۔۔ صفحہ [۶]
{7} ۔۔۔ہاں یہ کہنا کہ جس روایت کو امام بخاری پاس کردیں بس وہ پل سے پار ہوگئی تو یہ صریح غلط ہے۔ ۔۔۔ صفحہ [۷]
{8}۔۔۔ہم امام بخاری پریہی الزام لگا سکتے ہیں کہ انہوں نے روات کی بات کو قرآن پر پرکھنے کی کوشش بہت ہی کم کی ہے۔
صفحہ [۸]
{9} ۔۔۔امام بخاری نے جب اپنی کتاب کا نام رکھا الجامع المسند الصحیح تو پھر ان کی کتاب میں باطل روایات غیر مسند غیر صحیح۔۔۔۔۔۔روایات کیوں پائی جاتی ہیں۔ ۔۔۔ صفحہ[۹]
{10}۔۔۔امام بخاری نے صریحا قرآن کی نص قطعی کے خلاف مردہ کے جنازہ پر بولنے اور مردہ کے سننے کی جھوٹی روایت پیش کی۔ ۔۔۔ صفحہ [۱۱]
{11} ۔۔۔چنانچہ جس محدث کی نظر صرف جمع روایات پر تھی ان کی کتب میں قرآنی بصیرت بہت ہی کم ہے۔ صفحہ [۱۲]
{12} ۔۔۔امام بخاری چونکہ روایت کے پرستار تھے قرآنی بصیرت سے خالی آدمی امام اعظم کو خداع نہ کہے تو اور کیا کہے ۔۔۔۔ صفحہ [۱۲]
{13}۔۔۔نہ بخاری کو قرآن کا علم نہ انکے امام زہری کو علم نہ امام بخاری کو آپ اکی حیثیت نبویہ کا پاس نہ زہری ایسے بکواسی آدمی کو ۔۔۔ صفحہ[ ۱۴]
{14}۔۔۔امام بخاری جس نے جھانسہ تو دیا تھا کہ میری کتاب مسند ہے لیکن زہری ایسے بکواسی کی مرسل روایت ۔۔۔۔۔۔صفحہ[ ۱۴]
{15}۔۔۔کیا امام بخاری کا تدین ہے یا لعنتی راویوں کی کاٹاگر ی کیا امام بخاری اس جرم سے بری ہوسکتے ہیں اگر لعنتی راویوں نے بکواس تیار کیا ہے تو امام بخاری اتنا بے بصیرت تھا کہ ان کو کچھ بھی نہ سوجھا کہ میں اس خرافت کو کیسے درج کتاب کررہاہوں۔۔۔ صفحہ[ ۱۵]
{16} ۔۔۔قرآن کے قطعا مخالف امام بخاری نے بذریعہ ہشام کذاب مدلس آپ ا پر شرک وکفر کا اثر ماننا ثابت کیا ہے۔
صفحہ [۱۷]
{17}۔۔۔جناب بخاری کو عصمت نبویہ کا خیال نہیں آیاصفحہ [۱۷]
{18} ۔۔۔کاش بخاری کو قرآن کی بصیرت اور رسول اللہ ا کی سیرت پر عبور حاصل ہوتا۔۔۔ صفحہ [۱۸]
{19}۔۔۔ بخاری محدث رب کی تو ہین صفحہ۔۔۔ [۱۹]
{20}۔۔۔امام بخاری نے اپنی کتاب صحیح بخاری کتاب الرقاق صفحہ [۹۶۳] پر بڑے جذبات کے ساتھ یہودونصاری کے مذہب کی ترجمانی کر کے قرآن سے بغاوت اور خود اللہ کریم سے بغاوت کی روایت ٹانک دی ہے۔
{21}۔۔۔ قرآن میں عدم بصیرت کی وجہ سے ابراہیم علیہ السلام کی دعا کو امام بخاری نے اللہ کا وعدہ بنادیا۔۔۔ صفحہ [۲۴]
{22}۔۔۔ آپ نے شاید کبھی قرآنی بصیرت کا خیال تک نہیں فرمایا۔ صفحہ[۲۵]
{23}۔۔۔ لیکن شومی قسمت کہ اسناد کے چکر میں پڑنے اور مفہوم قرآن کو مہجور کرنے والے روات نے امام بخاری کو بھی ایسا الجھادیا کہ نہ ان کو قرآن کی تصریح سے آگاہی ہوئی نہ سیرت نبویہ کا پاس آیا نہ صحابہ کرام کی پاک طینت کو سوچا۔۔۔۔ صفحہ [۲۷]
{24}۔۔۔لیکن اللہ معاف فرمائے امام بخاری بے حیا راویوں پر اعتماد کلی کرکے رسول اللہ ا پر یہ جھوٹ بھی جڑ دیتے ہیں صفحہ [۳۱]
{25}۔۔۔لیکن امام بخاری روایت درج کتاب کرتے ہوئے شاید غیر شعوری حالت میں تھے ۔۔۔۔ صفحہ [۳۲]
{26}۔۔۔اما م بخاری کا اصل مشن روایات کا ڈھیر لگانا ہے قران میں بصیرت حاصل کرنا یا قرآن کو مقدم رکھنا ان کے زاویہ خیال میں بھی نہیں ہے ۔۔۔۔ صفحہ [۳۴]
{27}۔۔۔تعجب تو بخاری پر ہے کہ انہوں نے من وعن بے چوں وچرا صحابہ کرام کی حیثیت عرفیہ کو داغدار کرنے والوں اور لعنتی راویوں کے سینہ بسینہ ہوکر قرآن سے اتنی بے اعتنائی برتی کہ اہل رفض کے چھپے انداز میں ہمنوا بن جانے کا خیال بھی نہ کیا۔۔۔ صفحہ [۳۸]
{28}۔۔۔ لیکن بخاری صاحب جن کی نظر صرف روایات کے کثیر ڈھیر کی طرف تھی قرآن سے صرف نظر کرتے ہوئے کسی لعنتی راوی کی ایچ میں آکر صحابی رسول کے متھے جھوٹ کا ٹکہ لگاتے ہیں۔
صفحہ [۳۹]
{29}۔۔۔ لیکن بخاری محدث نے بڑے زور سے ایک جھوٹی روایت قرآن کے صریح خلاف نقل کردی ہے۔۔۔ صفحہ [۴۱]
{30}۔۔۔ بخاری کا مطمع نظر صرف روایات جمع کرنا تھا قرآنی بصیرت ان کا مشغلہ نہ تھا ۔۔۔ صفحہ [۴۲]
{31}۔۔۔ یہ حال ہے امیر المؤمنین فی الحدیث کا جو قرآن کے صریح خلاف روایت درج کرکے مشرکین کو نواز دیتے ہیں۔
صفحہ [۴۴]
{32}۔۔۔ امام بخاری اب غیر شعوری یا بے اعتنائی کے طور پر فرماتے ہیں اور روافض کے مذہب کی ریس میں کہتے ہیں صفحہ [۴۶]
{33}۔۔۔ امام بخاری کو قرآن فہمی کی داد دیجیئے ۔۔۔۔۔۔یہاں تک یاوہ گوئی کرجاتے ہیں ۔۔۔ صفحہ [۴۸]
{34}۔۔۔کسی لعنتی راوی کی گپ شپ پر کلی اعتماد کرنااورالفاظ قرآن کو پس پشت ڈال دینا کیا اسی کا نام امیر المحدثین ہوتا ہے صفحہ [۵۰]
{35}۔۔۔پھر ایسی خرافت درج کتاب کرنے والاایسی وعید سے کس طرح بچ سکے گا ۔۔۔ صفحہ [۵۲]
{36}۔۔۔ بخاری محدث عورت کی دبر زنی ۔لیکن بخاری صاحب اتنابڑا کفری نظریہ بے دھڑک ہو کر ایک جلیل القدر صحابی کے معصوم العمل ماتھے پر جڑ دیتے ہیں ۔۔۔ صفحہ [۵۲]
{37}۔۔۔لیکن امام بخاری صحابہ کرام کو بدنام کرنے میں کوئی کسر نہیں اٹھا رکھتے ۔۔۔ صفحہ [۵۴]
{38}۔۔۔بخاری محدث نبی پر افتراء ۔۔۔ صفحہ [۵۶]
{39}۔۔۔لیکن امام بخاری صاحب اپنی روایت کے ذریعہ آپ ا کا نابالغ لڑکیوں کے ساتھ جنسی کھیل کھیلنا ثابت کرتے ہیں ۔
صفحہ [۵۷]
{40}۔۔۔بخاری محدث نبی پر جھوٹ ۔۔۔ صفحہ [۶۴]
{41}۔۔۔ یہ امام بخاری کی بے نظری اور حلا ل وحرام کی حقیقت سے ناواقفی اور اس سے بے پرواہی کی دلیل تو نہ بنے گی صفحہ [۶۵]
{42}۔۔۔ بخاری محدث صحابہ پر بدعت کا فتوی صفحہ ۔۔۔ [۶۶]
{43}۔۔۔ یہ ہے محدثین کا حال جو قرآن میں بھی اختلاف ڈالنے سے بھی گریز نہیں کرتے ۔۔۔ صفحہ [۸۶]
{44}۔۔۔ لیکن امام بخاری قانون اور قاعدہ کے صریح خلاف ۔۔۔ فرماتے ہیں ۔۔۔ صفحہ [۹۳]
{45}۔۔۔امام بخاری کا باب باندھنا ہی صاف جھوٹ ہوا
صفحہ [۹۴]
{46}۔۔۔ امام بخاری کی خیانت یا بھول چوک ۔۔۔ صفحہ [۹۶]
{47}۔۔۔ مسلکی تعصب یہاں تک ایک محدث جلیل کولے گیا کہ حدیث کا نقشہ بدل کر رکھ دیا ۔۔۔ صفحہ [۹۸]
{48}۔۔۔ لیکن اخباری آدمی کا مطمع نظر چونکہ روایات جمع کرنا ہوتا ہے قرآن پا ک کی بصیرت حاصل کرنا ان کا شغل نہیں ہوتا اسی لیے امام بخاری نے بڑے وثوق کے ساتھ ایک روایت درج کتا ب کرکے۔۔۔۔۔۔ صفحہ [۱۰۱]
{49}۔۔۔ لیکن بخاری محدث نہ تو قرآن مقدس کی نصوص کی پرواہ کرتے ہیں ۔۔۔ صفحہ [۱۰۸]
{50}۔۔۔ آپ دیکھیں کہ امام بخاری نے ابن جریج کے طریق سے آیت کی جو درگت بنائی ہے ملاحظہ کریں۔۔۔ صفحہ [۱۱۳]
واجب الاحترام ناظرین:۔
ان عبارات کے نقل کرنے میں ہم نے کسی قسم کا مبالغہ نہیں کیا بلکہ من وعن نقل کیا ہے۔ اب آپ فرماویں امت کے جید علماء ،اہل فن جس شخصیت کو اسلام کا فخر اور امیر المؤمنین فی الحدیث کہیں اس شخص نے اسے مطعون کرنے میں کونسی کمی چھوڑی؟ جبکہ علماء کا یہ حال ہے
1 ۔۔۔عالم شہیر الامام عبداللہ بن حماد فرماتے ہیں
وددت انی شعرۃ فی صدر محمد بن اسماعیل
کاش میں امام بخاری کے سینہ کا بال ہوتا
یعنی جس سینہ میں حدیث کا خزینہ ہے میں اسی پر اگنے والا بال ہوتا۔
2۔۔۔خطیب نے اپنی سند سے امام فربری سے نقل کیا ہے وہ فرماتے ہیں۔
رأیت النبی ﷺ فی النوم فقال لی این ترید فقلت ارید محمد بن اسماعیل البخاری فقال اقرأہ منی السلام
میں نے خواب میں حضرت پاک ا کی زیارت کی آپ نے فرمایا کہاں کا ارادہ ہے میں نے عرض کی امام بخاری کی خدمت جانا ہے آپ ا نے فرمایا۔ انہیں میرے سلام کہنا
3 ۔۔۔سبح بن سعید فرماتے ہیں
کان محمد بن اسماعیل یختم فی رمضان فی النہار کل یوم ختمۃ ویقوم بعد التراویح کل ثلاث لیال بختمۃ
امام بخاری رمضان المبارک کے دنوں میں روزانہ ختم کلام پاک فرماتے تھے اور تراویح کے بعد تین راتوں میں ختم قرآن مجید فرماتے
[سیر اعلام النبلاء]
سچ ہے
ع قدرزر زرگر بداند قدر جوہر جوہری
رواۃ بخاری کے خلاف
{1}۔۔۔ کتا ب میں لعنتی راویوں کی بھر مار ہوگئی۔
قرآن مقد س اور بخاری محدث صفحہ [۶]
{2}۔۔۔لعنتی راویوں نے اسٹر گھسٹر کرکے کتاب کی قدر وقیمت گھٹا کے رکھ دی ۔۔۔ صفحہ [۶]
{3}۔۔۔بعض راوی جو رافضی شیعہ تھے انہوں نے تقیہ کرکے بخاری کو اپنے اعتماد میں لے لیا ۔۔۔۔۔۔مسودہ میں لعنتی راویوں نے دسیسہ کاری کی ۔۔۔ صفحہ [۹]
{4} ۔۔۔بہر کیف لعنتی راوی امام بخاری کے لئے مارآستین ثابت ہوئے ۔۔۔ صفحہ [۱۰]
{5}۔۔۔کیا یہ امام بخاری کا تدین ہے یا لعنتی راویوں کی کاٹا گری ہے ۔۔۔ صفحہ [۱۵]
{6}۔۔۔بذریعہ ہشام کذاب مدلس ۔۔۔۔۔۔ صفحہ [۱۷]
{7} ۔۔۔جناب بخاری ۔۔۔۔۔۔لعنتی راویوں سے اتنے مرعوب ہوئے ۔۔۔ صفحہ [۱۷]
{8}۔۔۔ انہوں نے لعنتی راویوں پر اعتماد کلی کرکے ۔۔۔۔۔۔ ۔۔۔ ۔۔۔ صفحہ[۲۲]
{9} ۔۔۔لعنتی راویوں پر اعتماد کلی کرکے اپنی اماں کو بھی امام بخاری بدنام اور خائن کہہ گئے۔۔۔ صفحہ [۲۳]
{10}۔۔۔مگر براہو لعنتی راویوں کا۔۔۔ صفحہ [۲۴]
{11}۔۔۔ورنہ لعنتی راویوں نے امام بخاری کو یوں اعتماد میں لے لیا تھا ۔۔۔ صفحہ [۲۵]
{12}۔۔۔یہ مغالطہ خود بخاری کو لعنتی راویوں کی طرف سے ہوا
۔۔۔ صفحہ [۲۹]
{13}۔۔۔ امام بخاری بے حیاء راویوں پر اعتماد کلی کرکے رسول اللہ پر یہ جھوٹ بھی جڑ دیتے ہیں ۔۔۔ صفحہ [۳۱]
{14}۔۔۔امام بخاری کا استاد زہری ۔۔۔۔۔۔جو اکثر علماء اسلام کی تحقیق میں عموماًاور اہل تشیع علماء کے نزدیک خصوصاً شیعہ پھکڑ با زبھی ہے۔ ۔۔۔ صفحہ [۳۴]
{15}۔۔۔لعنتی راویوں کے سینہ بسینہ ہو کر قرآن سے اتنی بے اعتنائی برتی۔۔۔ صفحہ [۳۸]
{16}۔۔۔ کسی لعنتی کی ایچ میں آکر۔۔۔۔۔۔ صفحہ [۳۹]
{17}۔۔۔ اور لعنتی راویوں کے برتے پر یہ اتہام بھی رسول اللہ ا پر لگاتے ہیں ۔۔۔ صفحہ [۴۵]
{18}۔۔۔ کسی لعنتی راوی کی گپ شپ پر کلی اعتماد ۔۔۔۔۔۔
۔۔۔ صفحہ [۵۰]
{19}۔۔۔ کیا ایسے فعل بد کو ذکر کرنے والے رواۃ لعنتی نہ ہونگے۔۔۔۔ صفحہ [۵۳]
{20}۔۔۔ کسی بے دین راوی پر اعتماد کرکے یوں لکھتے ہیں
صفحہ [۵۵]
{21}۔۔۔ لعنت ہو کینہ ور بدکردار راویوں پر۔۔۔ صفحہ [۵۹]
{22}۔۔۔ کسی شرارتی راوی کی روایت کے سبب امام بخاری باب باندھتے ہیں ۔۔۔ صفحہ [۵۹]
{23}۔۔۔ جن باتوں کو کذاب راوی نے جھوٹ کہا وہ قطعاًسچ ہے ۔۔۔ لیکن بددماغ روات کا چونکہ وطیرہ ہی جھوٹ ہے صفحہ [۶۲۔۶۳]